Mınıstrge qaraǵanda máseleni ákim kóbirek biledi - Máýlen Áshimbaev ákimdikterge qosymsha quzyret berý jaıly

ASTANA. QazAqparat – Qazaqstan ulttyq telearnasynyń «Bas taqyryp» baǵadarlamasyna suhbat bergen Parlamenti Senatynyń tóraǵasy Máýlen Áshimbaev jergilikti atqarýshy organdarǵa qosymsha quzyret berý bastamasynyń mánin túsindirdi, dep habarlaıdy QazAqparat tilshisi.

«Jergilikti jerdegi máselelerdi ákimder mınıstrlerge qaraǵanda kóbirek biledi. Neni sheshý kerek, ne mańyzdy, qarjyny qaıda baǵyttaý kerek degen máselelerdi ákimder kóbirek biletini anyq. Sol sebepti, biz keıbir quzyretterdi jergilikti atqarýshy jáne ókildi bılikke beretin bolsaq, onda sol mekendegi problemalar tezirek sheshilýi kerek. Sonymen qatar, óńirlerdi belsendi jumys isteýge yntalandyrý mańyzdy. Barlyq túsken salyqty ortalyqqa bere bermeı, onyń bir bóligin qaldyratyn bolsa, onda salyqty kóbirek jınaýǵa da qyzyǵýshylyq bolatyny túsinikti», - dep toqtaldy Máýlen Áshimbaev.

Senat tóraǵasynyń aıtýynsha, aýdandarǵa jeke bıýdjet berý máselesi pysyqtalady. Qazir aýdandar oblystyq bıýdjetten qarjy alady. Máýlen Áshimbaev bılik tarmaqtaryn qaıta bólý kezinde osy máseleler esekeriletinin atap ótti.

Sonymen qatar, Parlamenti Senatynyń tóraǵasy suhbat barysynda bankterdiń operatsııalar arqyly tapqan paıdasyna salyq salý máselesi qarastyrylatynyn aıtty.