Mınıstrdiń birinshi orynbasary qyz zorlady degen kúdikke ilingen polıtseıge qatysty pikir bildirdi

<p>Іshki ister mınıstriniń birinshi orynbasary Marat Qojaev qyz zorlady degen kúdikpen qamaýǵa alynǵan Taldyqorǵan polıtsııa basqarmasynyń bastyǵyna qatysty qozǵalǵan is boıynsha pikir bildirdi, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Bul is boıynsha tekserý jasaldy. Keshe Jetisý oblysynyń polıtsııa basshylaryna qatysty sheshim jarııalandy. Bul oqıǵa boıynsha uıatty jaǵdaı anyqtaldy, ony moıyndaý kerek. Kúdikti polıtseıdiń oıynda ne júrgenin bile almaımyz. Osyǵan deıin tekseristen talaı ótken bolatyn, ıaǵnı birazdan beri qyzmette júrgen adam. Biraq osyndaı teris áreketi anyqtalyp jatyr. Onyń jaýapkershiligi tergeý amaldary men sot sheshimi nátıjesinde anyqtalady», - dedi M. Qojaev Senattyń jalpy otyrysynan keıin tilshiler suraǵyna jaýap bere otyryp.

Tilshiler atalǵan kúdikti polıtseıdiń buǵan deıingi teris áreketteri boıynsha suraq qoıdy. «Buǵan deıin de ol qaramaǵyndaǵy qyzmetkerlerdi balaǵattap, basy daýǵa qalǵan bolatyn. Sol kezde ol nege qyzmetinen bosatylmady?», - dep surady tilshiler.

Óz kezeginde M. Qojaev tıisti tekseris barysynda osyndaı jaǵdaılar anyqtalǵanyn aıtty.

«Sol oqıǵa kezinde onyń laýazymy tómendetilgen edi. Odan keıin qyzmetin atqara kele, myna laýazymyna taǵaıyndalǵan», - dedi mınıstrdiń orynbasary.

Oblys ortalyǵynyń bas polıtseıi qyzmetin atqarǵan Marat Kúshtibaevtyń qyzmetin asyra paıdalanyp, jumys kabınetinde zorlyq jasaǵany jóninde buǵan deıin jazǵanbyz. Osy oqıǵaǵa boıynsha jábirlenýshiniń advokaty Nurlan Molbaev zorlyqtyń qalaı jasalǵanyn aıtyp berdi.

Taldyqorǵanda qyz zorlady degen kúdikpen ustalǵan polıtseı qalalyq mamandandyrylǵan sottyń sanktsııasymen eki aı merzimge qamaldy.

Sonymen qatar, Taldyqorǵanda bolǵan sońǵy rezonanstyq oqıǵaǵa baılanysty Іshki ister mınıstri Erjan Sadenov ІІM ortalyq apparaty qyzmet basshylarynan quralǵan arnaıy toppen Jetisý oblysyna bardy.

Kezdesýde ІІM basshysy Jetisý oblysynyń polıtsııa basshylaryna qatysty qabyldanǵan sheshimdi aıtty. Osylaısha oblystyq polıtsııa departamentiniń bastyǵy Atyǵaı Arystanov qyzmetinen bosatyldy.

Onyń birinshi orynbasary Jasulan Baıkenovke qyzmettik sáıkestiktiń tolyq emestigi týraly eskertildi.

Oblystyq departament bastyǵynyń kadr saıasaty jónindegi orynbasary Talant Jumabek pen tergeý boıynsha orynbasary Maqsat Erejepov te qyzmetinen bosatyldy.