Mınıstr Jitiqaradaǵy qaıǵyly oqıǵa boıynsha jańa derekterdi jarııalady

<p>ASTANA. KAZINFORM &ndash; Eńbek jáne halyqty áleýmettik qorǵaý mınıstri Svetlana Jaqypova Jitiqarada bes balasy qaza tapqan otbasynyń jaǵdaıyna qatysty suraqtarǵa jaýap berdi.</p>

«Qaıǵyly oqıǵa bolǵan kúni tańǵy saǵat 5-ke qaraı úlken balasy kórshilerine júgirip barǵan. Órt sóndirýshiler kelgen kezde, úıdiń shatyry opyrylyp túsken. Sol kúni Almatyda issaparda bolǵan edim. Biraq qaıǵyly oqıǵa bolǵan úıge bizdiń vedomstvodan departament dırektory birden bardy. Sondyqtan ol óńirde bolyp, máselemen egjeı-tegjeıli tanysyp, tıisti qoldaý is-sharalary uıymdastyryldy. Bul otbasyǵa ataýly áleýmettik kómek berilip kelgen», - dedi S. Jaqypova Májilistegi Úkimet saǵatynan keıin tilshiler suraǵyna jaýap bere otyryp.

Onyń sózine qaraǵanda, balalardyń anasy eki ret nekede bolǵan. Birinshi kúıeýinen - úsh bala, sondaı-aq ekinshi nekeden de úsh bala.

«Eń kishkentaı balasy mamyr aıynda bir jasqa tolyp, sol ýaqytta «Kúmis alqa» aldy. Resmı túrde ajyrasqan birinshi kúıeýinen jazda alıment retinde 330 myń teńge shamasynda aqsha alǵan», - dedi mınıstr.

Sonymen qatar ol balalardyń anasy jergilikti dúkende tazartýshy bolyp jumys istegenin aıtty.

«Biraq qaıǵyly oqıǵa bolǵan túni qalaǵa ketip qalǵan. Ne maqsatta jáne qandaı sebeppen ketkeni tergeý amaldary barysynda jarııalanbaı jatyr. Onyń sebebin bilmeımin. Atap aıtqanda, úıge 1995 jylǵy azamat kelip, keshki saǵat 9 kezinde úıdiń peshin jaǵyp, ketip qalǵan. Oǵan peshti balalardyń anasy tapsyrǵan sııaqty», - dedi Svetlana Jaqypova.

Bıyl 11 qazan kúni Qostanaı oblysynda órt shyǵyp, bes bala qaza tapty.

Qostanaı oblysynyń ákimi Qumar Aqsaqalov Jitiqaradaǵy qaıǵyly oqıǵanyń mán-jaıyna túsinik berdi.