Mınıstr jataqhanada oqytýshylardyń kezekshilik etýin synǵa aldy

NUR-SULTAN. QazAqparat – Bilim jáne ǵylym mınıstri Ashat Aımaǵambetov elimizde oqytýshylardy jataqhanada kezekshilikke jegip qoıatyn oqý orny basshylaryn synǵa aldy, dep habarlaıdy QazAqparat tilshisi.

«Biz monıtorıng júrgizdik. Baıqaǵanymyzdaı, áli de bolsa keıbir joǵary oqý oryndarynda oqytýshylardy jataqhanada kezekshi etip qoıý tyıylmaǵan. Júkti oqytýshylardyń moınyna arta salǵan. Oqytýshylar negizgi jumysynan bólek, kezekshilik mindetin atqarady. Eger jataqhanada qandaı da bir shara ótip, oǵan oqytýshylar tartylsa jóni bólek. Jataqhanadaǵy kezekshilikti ustazdarǵa júkteý durys emes. Bul ótken ýaqyttyń ádisi jáne ol tıimsiz. Eger jataqhanadaǵy stýdentterdiń qaýipsizdigin oılasańyzdar, shtattan arnaıy oryn bólip, bólek qyzmetker alyńyzdar. Sóıtip jumysty júıeli atqaryńyzdar», - dedi Ashat Aımaǵambetov mınıstrlikte ótken apparat keńesiniń jıynynda.

Sondaı-aq, mınıstr stýdentterdiń ózin-ózi basqarý qyzmetine qatysty pikir bildirdi.

«Keıbireýler aıtyp jatyr, ózin-ózi basqarýdyń JOO-na qatysy qansha dep. Ýnıversıtettiń úzdik bilim berýi ǵana emes onyń jumysynyń ilgerileýine stýdentterdiń tikeleı qatysy bar. Osy oraıda olarmen birlesip jumys istep, stýdentterdiń únine qulaq asyp, múmkindik berý kerek. Ózin-ózi basqarý stýdentterdiń uıymdastyrýshylyq qabiletin arttyryp, qoǵamdyq sharalarǵa belsene aralasýyna septigin tıgizedi. Osyǵan oraı elimizdiń ár joǵary oqý orny boıynsha stýdentterdiń ózin-ózi basqarý qyzmetine taldaý júrgizýdi tapsyramyn. Jáne jalpylama kerek emes, ár ýnıversıtet pen kolledjdiń jumysyna jeke-jeke taldaý jasalsyn», - deıdi ol.

Buǵan deıin Ashat Aımaǵambetov elimizde mektep oqýshylarynyń qaýipsizdigin qamtý máselesiniń tolyq sheshimin tappaǵanyn alǵa tartty .