«Mınıstr jastardy daıashy etkisi kele me?» - baspasózge sholý
***
«Egemen Qazaqstan» gazetiniń jazýynsha, keshe Ortalyq kommýnıkatsııa qyzmetinde «Samuryq-Qazyna» UÁQ» AQ basqarma tóraǵasy Ómirzaq Shókeev baspasóz máslıhatyn ótkizdi. Ol Úkimettiń keńeıtilgen otyrysynda júktelgen tapsyrmalardyń oryndalýy men «Nurly Jol» baǵdarlamasynyń júzege asyrylýy týraly, sondaı-aq qordyń kompanııalar tobynyń jetistikteri jóninde aıtty. Maqalada ulttyq qor aqsha únemdeý maqsatymen, ózine qarasty kompanııalar tobynyń bıylǵa arnalǵan shyǵystaryn 337 mlrd. teńgege qysqartyp, ońtaılandyrǵany aıtylǵan. Naqty sandarǵa júginsek, ákimshilik shyǵystar 64 mlrd. teńgeni, al kúrdeli shyǵystar 240 mlrd. teńgeni quraıdy eken. Qor basshysynyń aıtqanyna qaraǵanda, qysqartý jumysy meılinshe kúrdeli bolyp tabylatyn úlken kompanııalarda birtalaı sharalar atqarylypty. Máselen, «QazMunaıGaz» ulttyq kompanııasynyń menedjmenttik shyǵystary aǵymdaǵy jyly 134 mlrd. teńgege ortaısa, «Qazaqstan temir joly» UK» AQ bıýdjeti 84 mlrd. teńgege qysqartylmaq kórinedi. «Qarajatty osynshama qysqarta otyryp, jumys nátıjesin saqtaý asa kúrdeli sharýa. Degenmen, aǵymdaǵy shyǵystar boıynsha óndiristegi qyzmetkerlerdiń jalaqysy saqtalady, bıýdjetke mindetti salyqtar da tólenedi, ózge de áleýmettik qoldaýlar sekildi baptar óz qalpynda qaldyrylady», - dedi Ó.Shókeev.
Memleket basshysy Nursultan Nazarbaevtyń atyna Qazaqstan halqy Assambleıasy Keńesiniń Qazaqstan Respýblıkasy Prezıdentiniń saılaýyn ótkizý jónindegi bastamasyna baılanysty hattar men jedelhattar kóptep kelýde. Solardyń birparasy «Egemen Qazaqstan» gazetiniń senbilik sanynda jarııa etildi. Máselen, A.Áshimov, N.Yqtymbaev, S.Elýbaı, S.Narymbetov jáne R.Ábdiráshov syndy kınematografııa óneriniń birqatar tanymal qaıratkerleri Nursultan Nazarbaevtyń Otanymyzdyń ıgiligi jolyndaǵy qajyrly eńbegine rahmet aıtyp, prezıdenttik saılaýdy ótkizýdi zor yqylaspen jáne shynaıy qoldaıtyndyqtaryn atap ótken. Al Ekonomıka ınstıtýtynyń, «Ǵylym ordasy» RMK, Bilim jáne ǵylym mınıstrligi Ǵylym komıtetiniń fılosofııa, saıasattaný jáne dintaný ınstıtýtynyń basshylary ınnovatsııalyq ındýstrııalandyrýdy, ınfraqurylymdyq damýdy eldiń basty basymdyqtarynyń biri retinde jarııalaý ǵalymdar úshin mańyzdy oqıǵa bolǵanyna nazar aýdarǵan. Sonymen qatar stýdenttik sport federatsııasy biriktirgen qazaqstandyq joǵary oqý oryndarynyń barlyq sportshy stýdentteri prezıdenttik saılaý ótkizý elimizde sportty damytý jónindegi keýdeli jobalardy tabysty júzege asyrýdyń kepili bolyp sanalatyn Qazaqstan qoǵamyndaǵy turaqtylyqty saqtaýǵa septigin tıgizetinin atap ótken.
***
«Ótken aptada QR Densaýlyq saqtaý jáne áleýmettik damý mınıstri Tamara Dúısenova «qazaqstandyq jastardy daıashy jáne barmen bolýǵa úıretemiz» degen usynys aıtty. Mınıstr hanym munyń ázirge pılottyq joba ekenin, ári ony ońtústik-shyǵys elderiniń tájirıbesine súıene otyryp, jastardy qyzmet kórsetý salasyndaǵy qysqa merzimdi kýrstarǵa tartatynyn aıtqan edi», - dep jazady «Aıqyn» gazeti. Mınıstrdiń pikirinshe, daıarlyq kýrstary birneshe deńgeıde ótkizilmek. Birinshiden, arzan qoǵamdyq tamaqtaný ortalyqtarynda daıashy bolýdy úırenedi. Arnaıy kýrstardy bitirgen mamandar ekinshi deńgeıde qymbat dámhanalar men meıramhanalarda jumys isteı alatyn bolady. Al úshinshi kezeńde barmen mamandyǵyn ıgerip shyǵýǵa múmkindik alady. «Mınıstrdiń sóziniń de jany bar. Mundaı jobalar tálimgerlerge áleýmettik jumys berýge múmkindik beredi. Ári jastardyń áleýetti eńbekpen qamtamasyz etilýine de jol ashady. Mundaı tájirıbeler álemniń ozyq elderinde de kóptep kezdesedi. Ásirese, Eýropa elderi, onyń ishinde Frantsııa buǵan baıaǵyda kirisip-aq ketken. Jón-aq delik. Mınıstr hanym bir nársege erekshe mán bermeı otyrǵan sekildi. Onsyzda stýdent qaýymnyń elý-alpys paıyzy búgingi tańda daıashylyq pen barmendikti tabys kózine aınaldyryp alǵan joq pa?!», - dep jazady maqala avtory. Tolyǵyraq «Mınıstr jastardy daıashy etkisi kele me?» degen taqyryptaǵy maqaladan bile alasyzdar.
Osy basylymda akademık Ábdimálik Nysanbaevpen aradaǵy suhbat «Halyq Elbasynyń kemel saıasatyn kórip otyr» degen taqyryppen berildi. Basylym tilshisiniń barlyq saýalyna tuşymdy jaýap bergen ol: «Árıne, bizde bári jaqsy dep aıtsaq, eshkim sene qoımas. Azdy-kópti qıynshylyqtar joq emes. Ásirese, sońǵy ýaqyttaǵy qıturqy sanktsııalar azdap áser etýde. Biraq elimizde sátti jasalǵan ekonomıkalyq-qarjylyq reformalardyń arqasynda ony aınalyp ótýdemiz deýge bolady. Desek te, osyndaı kúrdeli tusta Prezıdent saılaýyn ótkizgeli otyrmyz. Jáne senimdi taǵy da Elbasyǵa artýdamyz. Nege deseń, mynadaı almaǵaıyp zamanda eldi, shashý shyǵarmaı, alǵa súıreı alatyn bilikti tulǵa qajet. Qazaqstan halqy tulǵa retinde Nursultan Nazarbaevty ǵana tanıdy. Іshte de, syrtta da bet-bedeldi, tájirıbeli, kóregen saıasatker dál qazirgi kezeńde elimiz úshin asa qajet. Álemdik saıası sahnada sózin ótkize alatyn, ǵalamdyq bastamalar kótere alatyn birden-bir tulǵa ol - Elbasy. Sondyqtan halyq qashanda ol kisini ózimen birge bolýyn, kósh bastaýyn qalaıdy. Elbasy bar jerde táýelsizdik bar, jerimizdiń tutastyǵy bar, halqymyzdyń aýyz birshiligi bar. Demek, qandaı jaǵdaıda bolsyn, halyq búgingi Prezıdentti qoldaıdy», - deıdi.
***
Elbasy Nursultan Nazarbaev Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Qaırat Qojamjarovty qabyldady. Bul jaıynda búgin «Kazahstansaıa pravda» gazeti jazdy. Basylymnyń atap ótýinshe, kezdesý barysynda Q.Qojamjarov Memleket basshysyna agenttiktiń qazirgi qyzmeti, sondaı-aq, memlekettik qyzmetti kásibılendirý jáne tıimdiligin arttyrý maqsatynda atqarylyp jatqan sharalar týraly baıandady. Nursultan Nazarbaev byltyr qurylǵan vedomstvonyń aldynda memlekettik qyzmet júıesin jetildirý, sybaılas jemqorlyq quqyq buzýshylyqtaryna qarsy is-qımyldy qamtamasyz etý turǵysynan mańyzdy mindetter turǵanyna nazar aýdardy.
***
«Semeıde Abaı atyndaǵy kitaphananyń qyzmetkerleri qazaq aqyny, aǵartýshy Abaı Qunanbaevtyń alda kele jatqan 170 jyldyq mereıtoıyn qalalyqtardyń qaperine salý úshin uly jerlesteriniń beınesi beınelengen sýretterdi avtobýstarǵa japsyryp shyqty», - dep jazady «Vremıa» gazeti «Chtım tebıa, chıtatel!» degen taqyryptaǵy maqalasynda. Basylymnyń jazýynsha, kitaphanashylar ózderiniń bul bastamasyn «Abaı murasy - el baılyǵy» dep atapty. Olar qoǵamdyq kólikterge tek qana uly aqynnyń sýretin japsyrmı, ony shyǵarmashylyǵyn, ómirbaıan jolaýshylarǵa keńinen tanystyrǵan.