Mınıstr jańa Ekologııalyq kodekstiń negizgi qaǵıdattaryn jarııalady

NUR-SULTAN. QazAqparat - QR Ekologııa, geologııa jáne tabıǵı resýrstar mınıstri Maǵzum Myrzaǵalıev jańa Ekologııalyq qujattyń qaǵıdattaryn atady, dep habarlaıdy QazAqparat tilshisi.

«Ekologııalyq retteýdiń halyqaralyq tájirıbesin eskere otyryp, ekologııalyq problemalardy sheshý úshin biz jurtshylyqpen birlesip, arnaıy jańa qujat ázirledik. Jańa Ekokodekstiń qoldanystaǵy Ekologııalyq kodeksten basty aıyrmashylyǵy – qorshaǵan ortaǵa teris áserdi boldyrmaý úshin aldyn alý sharalaryn qabyldaýǵa baǵyttalǵan», - dep toqtaldy mınıstr kodeks jobasyn Parlament Májilisinde tanystyrý barysynda.

Ekologııalyq kodeks jobasy 10 qaǵıdatqa negizdelgen:

1) aldyn alý qaǵıdaty;

2) túzetý qaǵıdaty;

3) aldyn ala saqtyq qaǵıdaty;

4) úılesimdik qaǵıdaty;

5) «lastaǵysh tóleıdi» qaǵıdaty;

6) turaqty damý qaǵıdaty;

7) ıntegratsııa qaǵıdaty;

8) ekologııalyq aqparattardyń qoljetimdilik qaǵıdaty;

9) qoǵamdyq qatysý qaǵıdaty;

10) ekojúıelik ustanym qaǵıdaty.

«Joǵaryda aıtylǵan qaǵıdattarǵa súıene otyryp, memlekettik baqylaýdy, ruqsat berý júıesin jáne sharýashylyq qyzmetti josparlaýdy jetildirý esebinen qorshaǵan ortanyń jaı-kúıin jaqsartýǵa múmkindik beretin birqatar negizgi baǵyttardy bólip kórsetýge bolady», - dedi M. Myrzaǵalıev.

Osy oraıda basty baǵyttardyń biri retinde ozyq qoljetimdi tehnologııalardy endirý men ekonomıkalyq yntalandyrý sharalary qamtylyp otyr.

Eske salsaq, Maǵzum Myrzaǵalıev elimizdegi ekologııalyq problemalardy ataǵan bolatyn.