Mınıstr ushaq apatynan zardap shekkenderge tólenetin materıaldyq kómek týraly aıtty

NUR-SULTAN. QazAqparat – QR Densaýlyq saqtaý mınıstri Eljan Birtanov Almaty mańynda «Bek Air» ushaǵynyń apatqa ushyraýy saldarynan zardap shekkenderdiń emine ketken shyǵyndaryn kim tóleıtindigin aıtty, dep habarlaıdy QazAqparat tilshisi.

«Emdeý tegin bolady. Sebebi bul shuǵyl jaǵdaı. Ol medıtsınalyq kómektiń kepildendirilgen kólemine kiredi», - dedi Úkimet otyrysynan keıin BAQ ókilderine suhbat bergen Eljan Birtanov.

Sonymen qatar, ol zardap shegýshi azamatty emdelýden keıin saýyqtyrýǵa baılanysty barlyq kómek mindetti áleýmettik medıtsınalyq saqtandyrý aıasynda kórsetiletindigin atap ótti.

«Bul patsıentterdiń barlyǵyn baqylaýda ustaımyz. Psıhologtar kómeginiń munan ary da jalǵasqany mańyzdy. Materıaldyq kómekke qatysty aıtar bolsaq, ony kimge qansha jáne qandaı kómek kórsetý kerektigin jergilikti atqarýshy organdar sheshedi», - dedi mınıstr.

Buǵan deıin ushaq apatynan zardap shekken 3 adamnyń aýrýhanadan shyqqanyn habarlaǵan edik.