Mınıstr UBT týraly: Bul ómirlerińizdegi eń jeńil emtıhannyń biri

NUR-SULTAN. QazAqparat - QR Bilim jáne ǵylym mınıstri Ashat Aımaǵambetov mektep bitirýshilerdi Ulttyq biryńǵaı testileýden qoryqpaýǵa shaqyrdy, dep habarlaıdy QazAqparat tilshisi.

«Jaqynda basym kópshiligińiz UBT tapsyrasyzdar. Odan qorqýdyń eshqandaı qajeti joq dep sizderge aıtqym keledi. Bul - tek qana jaı synaq. Onyń ústine bul ómirlerińizdegi eń jeńil emtıhannyń biri bolady», - dedi Ashat Aımaǵambetov Facebook paraqshasynda jarııalanǵan quttyqtaýynda .

Mınıstr «aınaladaǵy adamdar qolyńnan eshteńe kelmeıdi» dese de tabandylyq pen sabyrlyq, kúndelikti qajyrly eńbek pen alǵa qoıǵan maqsattaryńyz belgili bir nátıje ákeletindigin esten shyǵarmaý kerektigin atap ótti.

«Nátıje árıne, óz betimen kelmeıdi. Ol qatelikpen qatar júredi. Kishkentaı kezimizden bizdi «qatelik jasaý durys emes, keshirimsiz» dep sendirgen. Mektep qabyrǵasynan bastap qatelik jasamaý bizdiń sanamyzǵa quıyp keldi. Tabysty adam eshqashan qatelespeıdi degen qate uǵym ekenin aıtqym keledi. Alaıda, bári qatelik jasaıdy. Bastysy - odan sabaq alyp, tájirıbe jınaqtaý. Qatelik jasap, bárin qaıta bastaýdan qoryqpaý qajet«, - dedi mınıstr.

Osy rette ol bıylǵy jas túlekter Qazaqstannyń ǵana emes álem tarıhyndaǵy erekshe túlekter ekendigin basa aıtty.

«Sizder jaqsy tájirıbe jınaqtap, oı túıip, álemdi jaqsartýǵa úles qosasyzdar dep senemin. Elge paıdasy tıetin jańalyq ashyp, tolaǵaı tabysqa jetetsizder dep úmittenemin. Sizder tamasha kezeńde ómir súrip jatyrsyzdar. Qazirgi kezeń armandaıtyn, batyl sheshimder qabyldaıtyn ýaqyt. Belgisizdikter men ózgeristerdiń ýaqytynda sizderdiń basty qundylyqtaryńyz adaldyq, ádildik, mahabbat, qarapaıymdylyq pen batyldyq bolýy kerek. Sáttilik serik bolsyn! Armandaryńyzǵa qol jetkizip, ómir qundylyqtaryn esten shyǵarmańyzdar!», - dedi Ashat Aımaǵambetov.