Mınıstr UBT-ǵa daıyndyq barysynda sheshýdi qajet etetin máselelerdi atady

ASTANA. QazAqparat - Óńirler Ulttyq biryńǵaı testileý ótetin pýnktterdi zamanaýı tehnıkalarmen tolyq qamtamasyz etpegen. Bul týraly búgin Úkimettiń selektorlyq rejımdegi otyrysynda Bilim jáne ǵylym mınıstri Erlan Saǵadıev aıtty, dep habarlaıdy QazAqparat tilshisi.

«Sonymen qatar, UBT-ǵa daıyndyq barysynda sheshýdi qajet etetin máseleler de bar. Birinshi, monıtorıng nátıjesi boıynsha mınıstrlik tarapynan oblys ákimderine birneshe ret tehnıkalyq quraldardy, onyń ishinde 4 G mobıldi baılanys sıgnaldaryn basý quraldaryn, metall izdegishter, onlaın translıatsııalaý kameralaryn satyp alý jáne UBT ótkizý pýnkterin qamtamasyz etý týraly hat joldandy», - dedi mınıstr.

Onyń aıtýynsha, búgingi monıtorıng nátıjelerine sáıkes óńirlerdiń UBT pýnktteri áli kúnge deıin zamanaýı tehnıkalyq quraldarmen tolyq qamtamasyz etilmegen.

«Ekinshi, jergilikti atqarýshy organdardan bitirýshilerdi tasymaldaý, qajet jaǵdaıda olardy tamaqtandyrý men ornalastyrýdy qamtamasyz etý, sondaı-aq testileý kezinde bitirýshiler men ata-analar úshin arnaıy aýyz sýy, kondıtsıoner, medıtsınalyq-psıhologııalyq kómek, jalpy qaýipsizdik máselelerin uıymdastyrý boıynsha mindetteri saqtalady. Osyǵan baılanysty oblys ákimderi UBT-ny uıymdastyrý jáne ótkizý máselelerine arnaıy nazar aýdarýdy  suraımyz», - dedi Erlan Saǵadıev.