Mınıstr Tamara Dúısenova OQO-daǵy atqarylyp jatqan jumystarǵa oń baǵa berdi
Oblys ákimdiginde jınalǵan qala-aýdan ákimderi men tıisti sala basshylary qatysqan jıynda mınıstr óz isine sylbyrlyq tanytyp otyrǵan sheneýnikterdi saýaldyń astyna aldy, dep habarlaıdy «QazAqparatá HAA tilshisi.
Máselen, keler jyly 1- qańtardan bastap engiziletin medıtsınalyq saqtandyrý qory boıynsha azamattardyń tizimi jasalyp, olardyń qorǵa tóleý múmkindigi esepke alynýda. Ózge óńirlerde jumys istep júrgen ońtústikqazaqstandyqtar da, tipti qaıtys bolyp, tıisti anyqtamamen tirkelmegender jaıynda da maǵlumattar jınalyp jatyr. Talap boıynsha osy jyldyń birinshi shildesine deıin tıisti tizim mınıstrlikke joldanýy tıis bolsa, keıbir aýdan ákimdikteri talaptyń údesinen shyǵa almaýda. Bul rette Tamara Qasymqyzy belgilengen merzimde tizim jasalyp, naqtylanbasa jyl bastalǵanda azamattar arasynda túsinispeýshilik týyndaıtynyn atap ótti. Mysaly óńirde jumysqa qabiletti 424 myń adamnyń basym bóligi ózin-ózi nátıjeli jumyspen qamtyǵan. Olarǵa endi salyq ınspektsııasyna tirkelý kerektigin eskertý kerek.
«Oblysta 424 myń adam ózin-ózi jumyspen qamtyǵan dep otyr ǵoı. Olardyń ishinde kópshiligi sharýa qojalyqtarynda jumys isteıtin azamattar. Nemese bazarda turyp patent almaǵan, tirekeýge turmastan jolaýshy tasymaldaýmen aınalysatyndar. Ol azamattarǵa aıtýymyz kerek, «sizder salyq ınspektsııasyna tirkelip, patent alsańyzdar aı saıyn 1 414 teńge tóleısizder. Eger 2018 jyldyń qańtar aıyna deıin úlgermese ózin-ózi nátıjeli jumyspen qamtyǵan azamattar 2020 jylǵa deıin emhana kómegin memleket tarapynan tegin alady. Josparly statsıonarlyq kómekti óz qarajatyna alady», dep túsindirýimiz kerek. Jalpy biz oblys qala, aýdan ákimdikterin medıtsınalyq saqtandyrý máselesine óte kóp kóńil bólýin aıtyp jatyrmyz. Sondaı-aq bul baǵytta jer-jerdegi jumyspen qamtý ortalyqtarynyń jumysyn kúsheıtý kerektigin aıttyq», - dedi mınıstr Dúısenova.
Mınıstrdiń sózinshe mindetti áleýmettik medıtsınalyq saqtandyrý júıesine engen bir mıllıon teńge jalaqysy bar azamat pen 40 myń teńge jalaqy alatyn azamatqa birdeı medıtsınalyq kómek kórsetiledi. Qordyń ortaq bolý júıesi dúnıejúzindegi tájirıbeden alynǵan.
«Ortalyqtandyrylǵan medıtsınalyq qor deımiz. Kim aýyryp qaldy soǵan tolyq medıtsınalyq kómek beriledi. Mysaly, bir azamattyń eńbekaqysy 60 myń teńge. Qarajaty óte az jınalǵan. Biraq oǵan kardıohırýrgııalyq ota jasaý kerek. Ol 10 mıllıon teńge turady. Óz qarajatyna jasata almaıdy. Basqa azamattardan túsken qarajatty paıdalanyp tolyq medıtsınalyq kómek beriledi. Mıllıon teńge jalaqysy bar azamat medıtsınalyq kómekti tolyq alyp, 40 myń teńge jalaqysy bar adam medıtsınalyq kómek ala almaýy múmkin. Medıtsınalyq saqtandyrý júıesiniń eń negizgi prıntsıpi - bir jerge bir qorǵa jınap, kimge qandaı kómek kerek sony ýaqytyly kórsetý», - deıdi Tamara Dúısenova.
Jıynda kóterilgen ekinshi másele, zeınetaqyny kezeń-kezeńimen kóbeıtý men zeınetaqy jasyn arttyrý boldy. Tamara Qasymqyzynyń sózinshe qazir zeınet jasyna jaqyndaǵan azamattardy jumyspen qamtýǵa memeleketten qarajattar qarastyrylǵan. Sol jeńildikterdi qazir jasy alpysqa taıaǵan azamattardyń jumyspen qamtamasyz etilýine kúsh salý kerek. Bul rette Tamara Dúısenova barlyq atqarýshy bılik ókilderi men sala mamandaryna jumysty shıratý kerektigin aıtty. Al, aımaq basshysy Janseıit Túımebaev atqarylýy tıis jumystardy osy jyldyń qarasha aıyna deıin tolyq aıaqtap, tizimderdi mınıstrliktiń málimetterimen sáıkestendirý kerektigin atap ótti.
Óz kezeginde alqaly jıyndy qortyndylaǵan Eńbek jáne halyqty áleýmettik qorǵaý mınıstri Tamara Dúısenova Ońtústik Qazaqstan oblysynda osy baǵytta atqarylǵan jumystarǵa oń baǵasyn berdi.
Aıta keteıik, elimizde jumys berýshiler men jeke kásipkerler shildeniń 1-inen bastap mindetti áleýmettik medıtsınalyq saqtandyrý qoryna jarna aýdara bastaǵan. Resmı derek boıynsha, qazirge deıin qorǵa 800 mıllıon teńge túsken. Zań boıynsha, jumys berýshi aı saıyn jumyskerdiń jalaqysynan 1 paıyz mólsherinde, biraq 3 668, 9 teńgeden joǵary emes aýdarym jasaýy, jeke kásipkerler men olarǵa teńestirilgen tulǵalar - jeke qorǵaýshylar men notarıýstar, kásibı medıatorlar aılyq jalaqysynan 5 paıyz nemese 2 445, 9 teńge tóleýi tıis.