Mınıstr talapqa saı emes dıplom bergen ýnıversıtetterdi jazalaý týraly: Biz áli daıyn emespiz

<p>ASTANA. KAZINFORM &ndash; Ǵylym jáne joǵary bilim mınıstri Saıasat Nurbek bergen dıplomdary kásibı biliktilik talaptaryna saı bolmaǵan ýnıversıtetterden oqý aqysyn qaıtaryp alý týraly usynysty qoldamaıtynyn aıtty.</p>

«Byltyr Qazaqstanda kásibı biliktilikter týraly jańa zań shyqty. Osy zańdy biz aqyryndap, baıaý engizip jatyrmyz. Bul zań boıynsha mamandyqtar retteletin jáne rettelmeıtin mamandyqtar dep ekige bólinedi. Aqyryndap retteletin mamandyqtarǵa da mán berýimiz kerek. Endi keıbir mamandyq ıelerine eńbek naryǵynda jumys tabý úshin dıplom ǵana jetkiliksiz. Syrttaı táýelsiz komıssııa nemese ortalyq endi ol kisiniń biliktiligin sertıfıkattaýdan ótkizip rastaý kerek. Qazir osy zańnyń ishinde «Biliktilikti táýelsiz rastaý» degen uǵym bar. Sondyqtan osy jumys aqyryndap-aqyryndap jasalyp kele jatyr. Ony birden engizse, bizdiń túlekterimiz de daıyn emes, joǵary oqý oryndary da daıyn emes – úlken problema bolady. Biraq bıyl osy júıeni sizdermen synaqtan ótkizýimiz kerek. Ol úshin birneshe joǵary oqý ornyn tańdap alýymyz kerek. Dıplom ıesiniń biliktiligi rastalmaǵan jaǵdaıda ne isteıdi? Jumys berýshi oqý bitirgen mamandy dıplomymen qabyldamasa, ony oqytqan joǵary oqý orny qandaı jaýapkershilik arqalaıdy? Grantpen oqysa kim jaýap beredi, aqyly negizde oqysa kim jaýap beredi? Osy sııaqty kóptegen suraq shyǵyp jatyr», - dedi mınıstr L.Gýmelev atyndaǵy Eýrazııa ulttyq ýnıversıtetinde ótken forýmda.

Saıasat Nurbek depýtattar tarapynan jazalaýdyń qatal túri usynylǵanyn da aıtyp qaldy.

«Májiliste osyndaı bir pikirler aıtylyp jatyr. Túlektiń biliktiligi rastalmaǵan jaǵdaıda ony oqytqan joǵary oqý orny jazasyn shegý kerek dep otyr. Ol jaza qarjylaı turǵyda bolý kerek degen ustanym. Mysaly, Ulybrıtanııada túlek táýelsiz emtıhan arqyly dıplomyndaǵy kásibı biliktiligin rastaı alǵan kúnniń ózinde keıin jumysta sol mamannyń kesirinen apat nemese basqa da keleńsiz jaıt oryn alsa, kompanııaǵa úlken bir shyǵyn kelse, saqtandyrý tóleminiń 70-80 paıyzyn joǵary oqý orny men biliktilik sertıfıkatyn bergen táýelsiz ınstıtýt tóleıdi. Bizdiń ınstıtýttar, joǵary oqý oryndary ondaıǵa daıyn ba, daıyn emes pe? Bylaı qarasańyz óte qatal usynys. Birden aıtaıyn, Májilispen aqyldasyp, ondaı sharalardy qoldaǵan joqpyz. Bizdiń qazirgi ustanymymyz - «Áli daıyn emespiz». Keıin osyǵan ótýimiz kerek. Synaqtan birneshe ýnıversıtette ótkizip kóremiz. «Atameken» palatasymen birge, táýelsiz sertıfıkattaý ınstıtýttarymen bir eksperıment jasaýymyz kerek. Strategııamyz sodan keıin ǵana belgili bolady», - dedi vedomstvo basshysy.