Mınıstr syrtqy nesıe esebinen iske asyp jatqan jobalardy atady
«Búginde Qaraǵandydan Qapshaǵaıǵa (946 km) deıingi ýchaskelerde aýqymdy qurylys júrip jatyr. Elimizdiń shyǵysynda «Taldyqorǵan-Óskemen» (768 km) jáne «Qalbataý-Maıqapshaǵaı» (415 km) joldary qaıta jańǵyrtýdan ótýde. Alakóldiń týrıstik klasterin damytý úshin biz «Úsharal-Dostyq» (184 km) avtojolyn qaıta jańartyp jatyrmyz», - degen vedomstvo basshysy «Merki-Býrylbaıtal» (262 km) tasjolyn qaıta jańartý arqyly Balqash kóliniń kýrorttyq aımaǵyn sapaly ınfraqurylymmen qamtamasyz etý kózdelgenin eske saldy.
«Ońtústiktegi «Uzynaǵash-Otar» (96 km) avtojoly qaıta jańǵyrtylyp, Shamalǵan stantsııasynyń temirjol ótkeline jol aıryǵy salynýda. Batystaǵy «Aqtóbe-Atyraý-Astrahan» (740 km) jobasyn júzege asyryp jatyrmyz. Osy maqsattarǵa halyqaralyq qarjy ınstıtýttarynyń qaryzdary tartylǵan. Olardyń qatarynda Dúnıejúzilik, Eýropalyq qaıta qurý jáne damý banki, Azııa Damý Banki jáne «Eksımbank» nesıeleri bar», - dedi Beıbit Atamqulov.
Mınıstrdiń aıtýynsha, atalǵan jobalardan qıyndyqtar taýyndap jatqan kórinedi. Atap aıtqanda, Eýropa qaıta qurý jáne damý banki qarjylandyratyn «Balqash-Býrylbaıtal» (288 km) jáne «Uzynaǵash-Otar» (96 km) jobalarynda jumystardy sapasyz oryndaǵan merdigerlik uıymdarmen 4 kelisimshart toqtatylǵan.
«Qalǵan 2 ýchaske boıynsha bank erejeleri boıynsha merdiger uıymdy anyqtaý boıynsha konkýrstyq rásimder ótkiziledi. Jalpy, Memleket basshysy tapsyrǵandaı, Qaraǵandy-Balqash-Almaty dálizi 2023 jyly tolyǵymen aıaqtalady», - dep sendirdi mınıstr.
Beıbit Atamqulov «Eksımbanktiń» qarjylandyratyn «Merke-Býrylbaıtal» jáne «Qalbataý-Maıqapshaǵaı» jobalary boıynsha «SınSın» jáne «QazGerStroı» kompanııalary qıyndyqqa tap bolǵanyn atady.
«Atalǵan jobalardy iske asyrýǵa teńgeniń qunsyzdanýy men qubylmalylyǵy áser etti. Bıtým, tsement, metall, dızel baǵasynyń turaqty ósýi de áser etýde», - dedi Indýstrııa jáne ınfraqurylymdyq damý mınıstri.