Mınıstr Stanıslav Cherchesovtiń orynsyz áziline qatysty pikir bildirdi

<p>ASTANA. KAZINFORM - &nbsp;Qazaqstan ulttyq quramasynyń bas bapkeri Stanıslav Cherchesovtiń qazaq tilin kemsitýge tyrysqany týraly beınematerıal keńinen taralyp, qoǵam tarapynan narazylyq týǵyzǵan bolatyn. Týrızm jáne sport mınıstri Erbol Myrzabosynov osy jaıtqa qatysty pikir bildirdi.</p>

Mınıstr bas bapkerdiń mindeti ulttyq quramany jańa deńgeıge shyǵarý ekenin atap ótti. Sonymen qatar ol máseleni ary qaraı órshitpeı, keshirimdi bolýǵa shaqyrdy.

«Qurmetti dostar! Árıne, Stanıslav Cherchesovtiń «frantsýz tiline» qatysty qaljyńy orynsyz boldy. Muny Qazaqstan fýtbol federatsııasy da, bapkerdiń ózi de bek túsinedi. Degenmen Cherchesovtiń basty mindeti – ulttyq quramany jańa deńgeıge shyǵarý. Endeshe, oǵan eń aldymen kásibı qyzmetine qarap baǵa berýge shaqyramyn. Biz qashannan qonaqjaı, darhan minezdi, keshirimdi elmiz. Bizdi myqty el etetin de osy qasıetter. Sondyqtan máseleni odan ári órshite bermeı, halqymyzǵa tán keńpeıildik tanytqanymyz abzal. Kez kelgen daýly máseleni aqyl-parasatpen sheshetin tolerantty, órkenıetti, ıaǵnı dana qoǵam ekenimizdi kórsete bileıik. Stanıslav Cherchesov – halyqaralyq deńgeıdegi tanymal fýtbolıst ári 20 jyldyq tájirıbesi bar kásibı jattyqtyrýshy. Sondyqtan ol túbinde qazaqstandyq jankúıerlerdiń senimin aqtap, ulttyq quramany qazirgi kúrdeli kezeńnen abyroımen alyp shyǵady dep senemin. Bárimiz múddesi ortaq fýtbol janashyrlary retinde bir-birimizdi qoldap júreıik!», - dep jazdy mınıstr áleýmettik jelidegi paraqshasynda.

Aıta keteıik, QR Týrızm jáne sport mınıstrligi Stanıslav Cherchesovtiń áziline qatysty Qazaqstan fýtbol federatsııasyna resmı hat joldap, bas bapkerdiń áreketine qatysty Fýtbol federatsııasynan túsinikteme berýdi talap etken bolatyn.

Fýtbol federatsııasy túsinikteme berdi.

Stanıslav Cherchesov aıyppul tóleıtin boldy.