Mınıstr sport basqarmasynyń basshylary nege aýysyp jatqanyn túsindirdi
Bul turǵyda obektıvti kózqaras bar, ıaǵnı sońǵy jyldary Olımpıada oıyndaryndaǵy lıtsenzııalar sanynan medal alýǵa deıin nátıje aıtarlyqtaı tómendedi.
«Keıingi kezde óńirlerde basshylar aýysty. Óńirlerdegi basqarma basshylaryna qatysty mınıstrlik jaǵynan arnaıy komıssııa quryldy. Onyń quramyna mınıstrlik ókilderi, depýtattar, qoǵamdyq uıymdardyń ókilderi endi. Komıssııa aıasynda óziniń baǵdarlamasyn usynǵan kandıdat iriktelgennen keıin, biz sol adamdy oblys ákimdikterine usynamyz. Óz kezeginde jergilikti ákimdik ony taǵaıyndaıdy. Atap aıtqanda, tıisti talaptarǵa saı keletin, sport salasyn meńgergen, sport menedjmentin biletin adam osy salany basqarǵany jón», - dedi E. Myrzabosynov Májilistiń jalpy otyrysynan keıin tilshiler suraǵyna jaýap bere otyryp.
Onyń aıtýynsha, endi el óńirleri bir-birimen básekelespeıdi. Ár óńirge naqty tapsyrma beriledi. Bul rette olarǵa qandaı sport túrin damytý kerek ekeni jáne respýblıkalyq deńgeıde beretin nátıjesine qatysty naqty mindetter júkteledi.
«Barlyǵymyz memleket ıgiligi úshin jumys istep jatyrmyz. Al óńirlerdi damytý úturǵysynda durys qadamdar jasalsa, múddeler qaqtyǵysy bolmaıdy. Óıtkeni biz qazirdiń ózinde árbir óńirdiń aıasynda basym beriletin sportty aıqyndaımyz. Olar Olımpıada baǵdarlamasyna enetin sport túrleri, Paralımpıada baǵdarlamasy, ulttyq sport túrleri bolady», - dedi mınıstr.
Aıta keteıik, búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine dene shynyqtyrý jáne sport, sondaı-aq normalardyń artyq zańnamalyq reglamenttelýin boldyrmaý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
Qujat aıasynda sport federatsııalarynyń qyzmeti de ózgeredi.
Budan buryn habarlanǵandaı, óńirlik sport basqarmalary basshylary QR Týrızm jáne sport mınıstrligi janynan qurylǵan komıssııanyń kelisimimen taǵaıyndalady.