Mınıstr sońǵy qońyraýdy 25 mamyrǵa qaıtarýǵa qatysty pikir bildirdi
14:11, 07 Naýryz 2023
ASTANA. QazAqparat – Oqý-aǵartý mınıstri Ǵanı Beısembaev mektepte ótkiziletin sońǵy qońyraý dástirine qatysty túsinik berdi, dep habarlaıdy QazAqparat tilshisi.
«25 mamyrdaǵy sońǵy qońyraýdy qaıtarý týraly biraz ata-ana aıtyp jatyr. Sheshimdi qabyldaý jáne ony osy jyly birden ózgertý ońaı emes. Bul oqý josparyna, muǵalimderdiń saǵatyna jáne josparlanǵan bilim berý materıaldaryna áser etedi. Osyǵan deıin qabyldanǵan sheshim bıyl júzege asyrylady», - dedi Ǵanı Beısembaev Úkimet otyrysynan keıin BAQ ókilderiniń saýalyna jaýap bere turyp.
Mınıstrdiń aıtýynsha, sońǵy qońyraý ótkizý týraly buıryqty oqý qaýymdastyǵy men ata-analardy jınap, qaıta qaraý tapsyryldy. Túpkilikti sheshimdi sarapshylar qaýymdastyǵy qabyldaıdy.
Eske salsaq, buǵan deıin oqýshylardyń sońǵy qońyraý merekesi 1 maýsymda ótetini aıtylǵan edi.