Mınıstr sıntetıkalyq esirtkini taratýshylardy ustaýdyń qıyndyqtaryn atady
«Bizge sıntetıkalyq esirtkiler Reseı, Qytaı jáne Eýropa elderinen keledi. Búginde olardyń kóbisi poshtamen jetkiziledi. Buryndary olardy shekaradan ótken kezde ustaýǵa múmkin bolsa, qazirgi kezde poshtamen keledi. Sodan keıin esirtki qunyn kıvı ámııan arqyly tóleıdi. Bul turǵyda tek ony satyp alǵan adamdardy ǵana ustaı alamyz. Bıyl 125 isti qozǵadyq, onyń ishinde 89 qylmysty qysqartýǵa májbúrmiz, sebebi bul esirtkiler bizdiń tizimde joq. ıAǵnı olar jańadan paıda bolǵan esirtkiler. Olar ózderiniń is-qımyldarynyń tásilderin ózgertip jatyr», - dedi Q. Qasymov.
Sonymen qatar mınıstr bul baǵytta kúres sharalary tıimdi bolýy úshin ınternet-resýrstar jabylyp jatqanyn atap ótti.
«2017 jyly 522 resýrsty japtyq, al bıyl atalǵan zattardy taratýmen aınalysqan 3 200 saıttyń jumysyn toqtattyq. Ekinshiden, biz Ulttyq bank pen Qarjy mınıstrligine tıisti usynys jasadyq. Búginde tólemder týraly zańnamaǵa sáıkes, 100 AEK-ke (240 myń teńge) deıin somany aty-jónin kórsetpeı tóleýge bolady. Osy oraıda biz qarjy aýdarymdarynyń qozǵalysyn kórý úshin osyndaı tártipti alyp tastaýdy usyndyq. Qazirgi kezde bul másele qarastyrylyp jatyr», - dedi mınıstr.
Óz kezeginde Májilis tóraǵasy Nurlan Nyǵmatýlın QR Іshki ister mınıstrliginiń bul baǵyttaǵy qadamdaryna qoldaý bildirdi.
«Ókinishke oraı, ınternet ashyq bolǵannan keıin osy máselede eshqandaı shekara joq. Sondyqtan bul jumystar durys», - dedi Májilis spıkeri.
Talqylaýdan keıin palata depýtattary «Qazaqstan Respýblıkasynyń keıbir zańnamalyq aktilerine esirtki, psıhotroptyq zattar, sol tektester men prekýrsorlar aınalymyn baqylaý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Zań jobasynyń maqsaty - esirtki bıznesiniń jáne transulttyq uıymdasqan esirtki qylmysynyń jańa tegeýrindi talaptary men qaýipterine qarsy turý. Osy oraıda memleket qabyldap jatqan sharalardyń barlyǵyn qamtamasyz etý úshin qazirgi zańnamalyq esirtkige qarsy júıeni jańǵyrtý eskerilgen.