Mınıstr «SCAT» ushaǵynyń Taılandta ne úshin qańtarylǵanyn túsindirdi

ASTANA. QazAqparat – QR Indýstrııa jáne ınfarqurylymdyq damý mınıstri Qaıyrbek Óskenbaev Úkimet otyrysynan keıin BAQ ókilderine «SCAT» áýe kompanııasyna tıesili ushaqtyń Taılandta ne úshin qańtarylǵanyn túsindirdi, dep habarlaıdy QazAqparat tilshisi.

«Shynynda da Taılandta ondaı oqıǵa boldy. «SCAT» áýe kompanııasy boıynsha jaǵdaıy anyqtaldy. Onda tehnıkalyq sebep bolǵan. Komıssııa jumys istep shyqty. «SCAT» bergen tizim boıynsha ondaǵy qazaqstandyq jolaýshylarǵa búkil jaǵdaı jasaldy. Qonaq úıge ornalastyrylyp, tamaq berildi», - dedi mınıstr.

Aıtýynsha, ushaqtyń birneshe datchıgi istemeı qalǵan.

«Tehnıkalyq sebep bolǵanda, ushaq buzylmaǵan. Adamdardy qorqytpaý úshin aıtý kerek. Aqaý degende, bir datchık istemeı qalsa da aqaý bolyp esepteledi. Datchık qana istemeı turýy múmkin. Biraq sebebi tolyq anyqtalǵansha ushaq ushýǵa jiberilmeıdi. Bul oqıǵa týraly komıssııa meniń tapsyrmam boıynsha óz baǵasyn beredi», - dedi Qaıyrbek Óskenbaev.