Mınıstr Rýdnyıda qaza bolǵan jumysshylardyń eńbek shartyna qatysty túsinik berdi

<p>ASTANA. KAZINFORM &ndash; Eńbek jáne halyqty áleýmettik qorǵaý mınıstri Svetlana Jaqypova Rýdnyıda qaza bolǵan 4 jumysshy men Qazaqmys shahtasynda kóz jumǵan eki qyzmetkerdiń eńbek shartyna qatysty málimetterdi aıtty.</p>

«Qostanaı oblysyndaǵy jaǵdaıǵa toqtalsaq, bir jumysshymen azamattyq-quqyqtyq sıpattaǵy kelisimshart bolǵan, ıaǵnı eńbek sharty emes. Qalǵan úsheýin jumys berýshi bilmeıtini anyqtaldy. Bul adamdar eńbek sharttaryn bekitpegen. Sondyqtan tekserýdi Qostanaı oblysynyń memlekettik ınspektsııasy departamenti óz moınyna alǵan. Departament mamandary eńbek shartyna qatysty egjeı-tegjeıli anyqtaıdy», - dedi Svetlana Jaqypova Májilistegi Úkimet saǵatynan keıin tilshiler suraǵyna jaýap bere otyryp.

Budan bólek mınıstr Qazaqmystaǵy jaǵdaıǵa qatysty tıisti komıssııa qurylǵanyn aıtty.

«Komıssııa quramyna bizdiń departamenttiń ókilderi kirdi. Qazirgi kezde tergeý amaldary jalǵasyp jatyr. Qaza bolǵandardyń bireýiniń úsh balasy bar eken. Ol úsh balasyna bizdiń tarapymyzdan bazalyq tólemder belgilendi. Áleýmettik saqtandyrý qorynan da tólemder beriledi. Qorytyndy akt shyqqannan keıin, jumysshyny saqtandyrǵan kompanııadan tólem jasalady. Úsh balasyna 343 myń teńge somasynda tólem qoıyldy», - dedi vedomstvo basshysy.

Budan buryn habarlanǵandaı, Qostanaı oblysyndaǵy qaıǵyly oqıǵa 6 qazanda bolǵan. 112 pýltine Rýdnyı qalasynda 5 metr tereńdiktegi býnkerdi tazalaý jumystaryn júrgizý kezinde 4 adam tómen túsip, sý betine shyqpaı jatqany málim boldy. 

Esterińizge sala keteıik, «Qazaqmys» kompanııasyna tıesili «Saıaq-3» shahtasynda kómirtegi gazy shyǵyp, nátıjesinde shahtanyń eki qyzmetkeri qaza tapty.