Mınıstr reseılik arnalardy óshirý týraly: Saıası astary bar dep oılamaımyn

ASTANA. QazAqparat – QR Aqparat jáne qoǵamdyq damý mınıstri Darhan Qydyráli Qazaqstandaǵy Beeline platformasynan reseılik telearnalardyń óshirilýi týraly pikir bildirdi, dep habarlaıdy QazAqparat tilshisi.

Keshe birqatar aqparat quraly Qazaqstandaǵy Beeline kompanııasynyń 15 reseılik telearnanyń translıatsııasyn toqtatatynyn jazǵan edi.

«Odan habarym bar. Jalpy búgin Beeline kompanııasynyń málimdemesi shyqty. Munyń mınıstrlikke qatysy joq. Sebebi bul jeke kompanııa, keńsesi Gollandııada ornalasqan. Olar óz qoldanýshylary men aýdıtorııasyna taldaý júrgizedi, sol arqyly derbes sheshim qabyldaıdy. Translıatsııa 5 qazannan bastap toqtatylady dep jazǵan eken, búgingi málimdemesin oqydyq. Onyń saıası astary bar dep oılamaımyn. Beeline kompanııasy óziniń qarjylyq máselelerine, jarnama túsimine qaraıtyn shyǵar, basqa da sebepteri bar shyǵar, jáne onyń jeke kompanııa ekenin umytpaý kerek», - dep jaýap berdi mınıstr Májilis kýlýarynda tilshilerdiń suraǵyna.

Sonymen birge, Aqparat mınıstri eldegi reseılik BAQ jumysy jóninde óz pikirin bildirdi.

«Jalpy kez kelgen zańbuzýshylyq bolsa, Qazaqstan zańnamasyna sáıkes shara qoldanylady. Ázirge bizge esh shaǵym túsken joq», - dedi Darhan Qydyráli.

Aıta keteıik, keshe «Beeline Qazaqstan» kompanııasy resmı málimdeme jasady.

«Pakettik usynymdar men kontenttik toltyrymdy qaıta qaraý – tsıfrlyq operatorlar úshin abonentterimizdiń qalaýyna sáıkes jalǵastyrylatyn «Beeline Qazaqstannyń» úırenshikti tájirıbesi. Biz nazar aýdaratyn negizgi paıdalanýshylarymyz – oıyn-saýyq video-on-demand kontentin tutynatyn jastar aýdıtorııasy. Mysaly, «Maksımým» paketine álemniń túkpir-túkpirinen 1000-nan astam fılmder men serıaldar BeeTV+ jazylymy qosylady», - dep túsindirdi Beeline kompanııasy.

Ashyq kózderden alynǵan foto