Mınıstr pavlodarlyq kásiporyndarǵa jol salýda óndiristik qaldyqtardy paıdalanýdy tapsyrdy

PAVLODAR. QazAqparat – Ekologııa, geologııa jáne tabıǵı resýrstar mınıstri Serikqalı Brekeshev Pavlodar oblysynyń kásiporyndaryna jol salý kezinde óndiristik qaldyqtardy paıdalanýdy tapsyrdy, dep habarlaıdy QazAqparat tilshisi.

«Oblysta jyl saıyn 7,5 mln tonna kúl úıindileri shyǵarylady. Bul qorshaǵan ortaǵa qosymsha antropogendi áserdi týdyrady. Osyǵan baılanysty oblysta ónerkásiptik qaldyqtardy qaıta óńdeý boıynsha belgili bir jumystar júrgizilýde. Mysaly, «Qazhrom» Transulttyq kompanııasy» Aqsý ferroqorytpa zaýytynda joǵary kómirtekti ferrohromnyń shlagy qaıta óńdeledi. Bıylǵy Ⅰ jartyjyldyqta 594,6 myń tonna shlak óńdelgen. Pavlodar munaı-hımııa zaýyty jylyna 26,5 myń tonna munaı shlamdaryn óńdeıdi. Bul munaı shlamdarynyń jyldyq túzilý kóleminiń 91 paıyzyna sáıkes keledi. Sondaı-aq, «Qazaqstan alıýmınııi» AQ óndirisiniń qaldyqtary joldardy salý jáne jóndeý kezinde paıdalanylady.

Bul tek jeke mysaldar. Sondyqtan kásiporyndar ákimdikpen, «Qazavtojolmen» jáne Ekologııa departamentimen birlesip avtomobıl joldaryn salý kezinde qaldyqtardy paıdalaný múmkindigin qarastyrý qajet», - dep tapsyrma júktedi mınıstr.

Eske sala keteıik, buǵan deıin Pavlodar oblysynda tabıǵatty qorǵaý maqsatynda óńir kásiporyndary 5 jylda 73 mlrd teńge ınvestıtsııa quıǵanyn habarlap edik.