Mınıstr Pavel Dýrovty Qazaqstanǵa shaqyrdy

<p>ASTANA. KAZINFORM &ndash; QR Tsıfrlyq damý, ınnovatsııalar jáne aeroǵarysh ónerkásibi mınıstrligi Telegram messenjeriniń negizin qalaǵan Pavel Dýrovpen birge jumys isteýge nıetti. Jaslan Mádıev ony Qazaqstanǵa shaqyrǵan.</p>

«Paveldiń Ortalyq Azııaǵa kelgenin, Ystyqkólge barǵanyn bilemin. Men onyń tikeleı jumys isteıtin komandasymen tanyspyn, Pavel Dýrovtyń ózimen tanysyp úlgermedim. Degenmen, bizdiń shaqyrtýymyz oǵan jetkizildi dep estidim. Aldaǵy ýaqytta ol Qazaqstanǵa da keledi dep úmittenemin. Oǵan jeke ózim kúsh-jigerimdi salamyn. Talqylaıtyn taqyryp kóp, birlesken zerthanalardy iske qosqymyz keledi», - dedi J. Mádıev Úkimet úıinde ótken brıfıngte. 

Mınıstr Telegram messenjeri – joǵary tehnologııaly kompanııa ekenin atap ótti. 

«Jaqynda olar blokcheın tehnologııalar, krıptoındýstrııa salasyndaǵy kompanııalarmen ıntegratsııa boıynsha birqatar bastama jarııalady. Blokcheın salasyndaǵy qosymshalarǵa arnalǵan platformany iske qosýda. Sondyqtan, joǵary tehnologııalyq jobalar men basqa da taqyryptardy belsendi talqylaımyz dep oılaımyn. Osy baǵytta jumys isteımiz», - dep tolyqtyrdy Tsıfrlyq damý mınıstri.