Mınıstr óskemendik jastarǵa qazirgi zamannyń stýdenti qandaı bolýy kerektigin aıtty

<p>QR Ǵylym jáne joǵary bilim mınıstri Saıasat Nurbek Óskemenge jumys saparymen baryp, S.Amanjolov atyndaǵy ShQÝ jastarymen kezdesti, dep habarlaıdy <a href="Kazinform." target="_blank" rel="noopener">Kazinform.</a></p>

Búginde bul bilim ordasynda 10 000-nan astam stýdent oqyp jatyr. Mınıstrmen kezdesken belsendi jastar kókeıde júrgen suraqtaryn qoıyp, jaýap aldy. Stýdentterdi ǵylymdy qoldaý maqsatynda atqarylyp jatqan jumystar, jataqhanamen qamtamasyz etý, oqýdy aıaqtaǵan soń jumysqa ornalasý syndy máseleler qyzyqtyrdy.

«Qazirgi basym mindetterdiń biri – aýyl sharýashylyǵy, taý-ken salasy, metallýrgııa, mashına jasaý, energetıka sııaqty barlyq salaǵa áser etetin Qazaqstan ǵylymyn jas ǵalymdar legimen tolyqtyrý. Sol sebepti ǵylymı otandyq bazany jańa ázirlemelermen jáne jas kadrlarmen qamtý qajet. Bul máselede ýnıversıtet ǵylymy mańyzdy ról atqarady. Onyń damýyna memlekettik qoldaý asa áser etedi. Osy jerde «Akademııalyq jáne basqarýshylyq derbestik týraly» Zań qabyldanǵaly Qazaqstannyń joǵary biliminiń jańǵyrǵanyn, kadrlar daıarlaýǵa degen memlekettik tapsyrys kóleminiń ulǵaıǵanyn atap ótken jón. Bul shara jas talantty bilim alýshylardyń ǵylymı zertteýlerge jáne joǵary reıtıngisi bar jýrnaldarda maqala jarııalaýǵa degen qulshynystaryn arttyrdy», - dedi Saıasat Nurbek.

Óz sózinde ol búgingi zamannyń stýdenti qandaı bolý kerektigin atap ótti. 

«Osy zamanda tek bilim alyp qana shektelmeý kerek. Jetistikke jetý úshin adam ıntellektisiniń tek 2 paıyzy ǵana kádege jaraıdy eken. Al qalǵan úles tabandylyqta. Sol úshin biz alǵan baǵytynan qaıtpaıtyn, shydamdy, ustanymy berik adam bolýymyz qajet. Odan keıin sportty janǵa serik etken jón. Sebebi erteń syrqat qyssa alǵan bilimnen esh paıda bolmaı qalady. Taǵy bir aıta keterligi, stýdentter durys aqparatty ǵana qabyldaýy tıis. Sebebi aqparat zamanynda múlde paıdasyz, ýaqytty bos óltirer dúnıeler kóp», - dedi QR Ǵylym jáne joǵary bilim mınıstri.