Mınıstr Oralov TikTok basshylyǵymen qazaqtildi kontentti damytýdy talqylady
Quramynda kompanııanyń óńirlik basshylary men menedjerleri bar sheteldik delegatsııany TikTok-tyń bılik organdarymen ózara is-qımyl jónindegi vıtse-prezıdenti Takýıa ıAmagýchı bastap kelgen.
Taraptar qazaq tilindegi kontentti damytý jáne qazaqstandyq sportty, mádenıet pen týrızmdi ilgeriletý maqsatynda ekijaqty yntymaqtastyqty talqylady.
Biz úshin memlekettik tilde mádenıet, sport jáne týrızm bóliginde kontent daıyndaý basym baǵyt sanalady. Men, áleýmettik jelilerdiń belsendi qoldanýshysy retinde, aqparatty jetkizý úshin ártúrli quraldardy qoldaný qanshalyqty mańyzdy ekenin túsinemin. Instagram, Facebook áleýmettik jelilerindegi paraqshalarymdy ózim júrgizemin, sonymen qatar jaqynda Telegram-da kanal ashtym. Bul aqparatty jedel jetkizýge jáne ýaqyt kóshine ilesip otyrýǵa múmkindik beredi. TikTok Qazaqstanda tez tanyldy. Elimizdegi mıllıondaǵan adam osy áleýmettik jelide, sonyń ishinde qazaq tilinde vıdeorolıkterdi qarap, jobalar jasap, akkaýnttaryn júrgizip otyr. Biz óz tarapymyzdan kitaptar, fılmder, spektaklder jáne taǵy basqasy bolsyn, qazaqtildi kontenttiń úlesin arttyrý baǵytynda jumys istep jatyrmyz
, – dedi Ashat Oralov.
Qonaqtar óz kezeginde Qazaqstannyń mol áleýetin atap ótip, aldaǵy josparlary týraly aıtyp berdi.
Biz basqa elderdegi mınıstrliktermen ózara is-qımyl jasaımyz jáne Qazaqstan Respýblıkasynyń Mádenıet jáne sport mınıstrliginiń ashyqtyǵyna qýanyshtymyz, aldaǵy ýaqytta mınıstrliktiń jumysyn kórsetýge, aýdıtorııany jobalarǵa tartýǵa daıynbyz. Bizge qazaqstandyq naryq óte tartymdy jáne qazaq tilindegi kontentti qoldaımyz. TikTok – qazaq mádenıetin búkil álemge nasıhattaý quraly bola alady. Kontent qaralymy kóbinese el halqynyń sanynan asyp túsedi, al qazaqstandyq avtorlardyń mıllıardtaǵan aýdıtorııaǵa shyǵý múmkindigi bar. Sondyqtan biz yntymaqtastyqty nyǵaıtýǵa nıettimiz. Atap aıtqanda, mysaly, jazda #kitaptok chellendjiniń ekinshi tolqynyn iske qosýǵa bolady. Sondaı-aq biz kontent óndirýge arnalǵan trenıngterdi ótkizýge daıynbyz
, - dedi TikTok-tyń bılik organdarymen ózara is-qımyl jónindegi vıtse-prezıdenti Takýıa ıAmagýchı.
Esterińizge sala keteıik, QR MSM men TikTok baspasóz qyzmeti birlesken birneshe jobany júzege asyrdy. Atap aıtqanda, #Naýryz2023 onlaın-festıvali aıasynda vıdeorolıkter 200 mıllıonǵa jýyq qaralym jınady, al #BookTok jalpy álemdik trendi aıasynda #kitaptok aktsııasy – 40 mıllıon márte qaraldy.
Ótken jyly «Kazakh Tourism UK» AQ jáne TikTok kásibı gıdterden tikeleı efırde vırtýaldy ekskýrsııalar serııasynan bastalǵan #TravelKazakhstan jobasyn iske qosty. Qazir osy heshteg boıynsha rolıkter 23,1 mıllıon qaralym jınap otyr.