Mınıstr Oralov kontsertmeısterler men bıshilerdiń ál-aýqatyn kóterýdi josparlap otyr

ASTANA. QazAqparat – Aǵymdaǵy jyly kontsertmeısterler men bı ansambli ártisteriniń ál-aýqatyn kóterý josparlanyp otyr. Bul týraly Mádenıet jáne sport mınıstri Ashat Oralov vedomstvo keńeıtilgen alqa otyrysynda málim etti, dep habarlaıdy QazAqparat tilshisi.

«Ulttyq» mártebe berilgen 5 mádenıet uıymy qyzmetkerleriniń aılyq eńbekaqysy 1,75 koeffıtsıentke ósti. Bıylǵy jyly da sala qyzmetkerleriniń áleýmettik jaǵdaıyn jaqsartý nazardan tys qalmaıdy. Shyǵarmashylyq joǵary oqý oryndaryndaǵy kontsertmeısterler, sondaı-aq úrmeli mýzykalyq aspaptarda oınaıtyn memlekettik mádenıet uıymdarynyń qyzmetkerleri men bı ansambli ártisteriniń ál-aýqatyn kóterý josparlanyp otyr. Osy oraıda, zańnamalyq aktilerge tıisti ózgerister engizý jumystary bastalyp ketti», - dep málim etti mınıstr.

Sonymen qatar alqa otyrysynda baıandama jasaǵan Ashat Oralov elimizde 20-ǵa jýyq memlekettik muraǵat ǵımaratyn salý qajet ekenin aıtty.