Mınıstr Omarov: Jer tek elektrondy formatta beriledi

NUR-SULTAN. QazAqparat – Aýyl sharýashylyǵy mınıstri Saparhan Omarov jer qatynastaryn tsıfrlandyrý jumystary qalaı júrgizilip jatqanyn aıtyp berdi, dep habarlaıdy QazAqparat tilshisi.

«Agroónerkásip keshenin tsıfrlandyrýǵa qatysty bizde jospar kóp. Alaıda, bul rette, men negizgi úsh máseleni atap óteıin. Birinshiden, jer qatynastaryn tsıfrlandyrý boıynsha qazirgi ýaqytta QR Tsıfrlyq damý, ınnovatsııalar jáne aeroǵarysh ónerkásibi mınıstrligimen birge tıisti zań jobasy ázirlenip, oǵan sáıkes jer aýmaqtarynyń bári de tsıfrlandyrylady. Jalpy qazir aýyl sharýashylyǵy jerleriniń barlyǵy da tsıfrlandyrylyp qoıǵanyn atap ótý kerek. Endigi kezekte jerdiń basqa túrlerin osy ádispen tsıfrlandyramyz. Zań jobasy qabyldanǵannan keıin jerdiń bári elektrondy formatta beriledi», - dedi Saparhan Omarov Úkimettiń baspasóz ortalyǵynda ótken brıfıngide.

Mınıstrdiń aıtýynsha, eń aldymen, adam faktory men bıýrokratııany joıyp, jer boıynsha túsken ótinimderdi qaraý merzimin qysqartýǵa mańyz beriledi.

«Ekinshi másele – aýyl sharýashylyǵy ónimderin baqylaý. Qazir ІT-kompanııalardyń birimen oǵan qatysty joba ázirlenýde. Úshinshiden, aýyl sharýashylyǵy ónimderiniń elektrondy saýdasyna basymdyq beriledi», - dedi ol.

Eske sala ketsek, Aýyl sharýashylyǵy mınıstrligi osy jyldyń qyrkúıegine deıin jer qatynastary salasyn tsıfrlandyrý jónindegi zań jobasy Parlament Májilisine engiziletinin habarlaǵan edi.