Mınıstr Myrzaǵalıev balyq aýlaýdan balyq ósirýge beıimdelýdi usyndy
Onyń málimetinshe, Ekologııa mınıstrligi Úkimet basshysy Asqar Mamınniń salany damytýǵa kedergilerdi anyqtaý tapsyrmasyna oraı ǵalymdarmen, sarapshylarmen birge sý qoımalaryn zerttegen. Nátıjesinde, olardy balyq aýlaýdan balyq ósirýge beıimdeý qajettigi sheshilgen.
«Biz ǵalymdarmen, osy saladaǵy sarapshylarmen birlesip elimizdegi sý qoımalaryn zerttep shyqtyq. Arasynda áleýeti joǵary degen sý qoımalaryn anyqtadyq. Ótkizgen zertteýdiń aıasynda osy jerlerde jylyna 600 myń tonna balyq ósirýge bolatyny belgili boldy. Biz osyny negizge ala otyra, balyq ósirýdi óńirlerge bólip, syzbasyn jasadyq. Mysaly, Túrkistan oblysyndaǵy Shardara sý qoımasy tuqy balyǵyn jáne bekire tuqymdas balyq túrlerin ósirý úshin qolaıly bolsa, Shyǵys Qazaqstandaǵy Óskemen, Buqtyrma sý qoımalarynda alabalyq, aq saqa tuqymdas balyqtardy ósirýge bolady. Al Almaty oblysyndaǵy Bartoǵaı jáne Qapshaǵaı sý qoımalary men Balqash kóli alabalyq, tuqy balyqtaryn, Soltústik Qazaqstan, Qostanaı, Aqmola oblystary aq saqa jáne tuqy túrlerin ósirý úshin qolaıly. Al Mańǵystaý oblysynda arqan balyq jáne bekire, Qyzylorda oblysyndaǵy Aral teńizinde tuqy balyǵyn ósirýge bolady», - deıdi ol.
Eske sala ketsek, QR Ekologııa, geologııa jáne tabıǵı resýrstar mınıstri Maǵzum Myrzaǵalıev búgin Úkimet otyrysynda balyq sharýashylyǵyn damytýǵa kedergi keltiretin 3 problemany atady.