Mınıstr munaı tasymaldaıtyn balama joldardyń qýatyn atady
«Munaı tasymalynyń balama joldary degende, birinshiden, Atyraýdan Reseıdiń Samar ólkesine deıin baratyn munaı qubyry bar. Odan keıin Reseıdiń júıesine qosylyp, Qara Teńiz ben Baltyq teńizine deıin jetedi. Sol qubyr arqyly qazir 6,5 mılıonnan 7 mln tonnaǵa deıin qosymsha munaı jiberýge bolady. Biraq onyń sapasy basqasha bolady. Kaspıı qubyr konsortsıýmynda «CPC Blend» degen sapa standartynyń munaıy tasymaldanady. Atyraý-Samar qubyry arqyly tasymaldasaq, «Urals» standartty munaı bolyp shyǵady. Onyń jeńildikteri bar. Biraq qazirgi másele aqshada emes, munaıdy ornalastyrýda bolyp otyr», - dedi Bolat Aqsholaqov.
Sondaı-aq, ol Aqtaý teńiz portynyń qýattylyǵy burynǵydaı emes ekenin aıtady.
«Ekinshisi –Aqtaý teńiz porty. Kezinde bul porttyń qýaty 12 mln tonnaǵa deıin keńeıtilgen. Biraq qazirgi ýaqytta shekteýli. Bul port arqyly 5 mln tonnaǵa deıin munaı tasymaldaýǵa bolady. Ári qaraı Baký arqyly Qara Teńizge deıin jetkizýge bolady. Ol jerden tutynýshylarǵa kememen apara alamyz. Temirjolmen de munaı jetkizýge bolady. Biraq, ókinishke qaraı, bizde vagondar shekteýli bolyp tur. Onyń sebebi kóp. Qazirgi álemdegi jaǵdaı jáne ishki naryqta da óte paıdaly tasymal quraly bolyp sanalady. Sol sebepti temirjoldyń qýattylyǵy Teńiz portyna deıin jetkizýge ǵana jetedi», - dedi vedomstvo basshysy.
Onyń aıtýynsha, Atasý-Alashankoý marshrýtynyń áleýeti de shekteýli. Óıtkeni reseımen arada bekitilgen kelisimsharttar bar.
«Alashankoý boıynsha aıtsaq, 2017-2018 jyldary reıvers jumysyn bastap edik. Bul ózi Aqtóbe oblysynan Atyraý oblysyna deıin baratyn qubyr bolatyn. Qazir bul Atyraýdan Keńqııaqqa deıin barady. ıAǵnı, baǵytyn reıvers arqyly burǵanbyz. Onyń qýattylyǵy qazir 6 mln tonna. Bul qubyr munaıdy ishki naryqqa jetkizýge baǵyttalǵan. Qazir Pavlodar men Shymkenttegi munaı óńdeý zaýyttaryn jabdyqtaýymyz kerek. Sol sebepti bul marshrýtqa reıvers jasadyq. Ári qaraı Atasýdan Alashankoýǵa deıin baratyn qubyrdyń qýattylyǵy –20 mln tonna. Qazirgi tańda 11,5 mln tonna tasymaldanyp jatyr. Onyń kóbi – 10 mln tonnasy Reseıdiń tranzıttik munaıy. Kezinde biz kelisimshartty ratıfıkatsııalap, qol qoıǵanbyz. Qalǵan 1,5-2 mln tonna ózimizdiń munaı tasymaldanady», - dedi mınıstr.