Mınıstr Muhamedıuly Eslıamova men Dvortsevoı týraly: Shyǵarmashylyq tandem óz jetistigin qaıtalady

ASTANA. QazAqparat - QR Mádenıet jáne sport mınıstri Arystanbek Muhamedıuly qazaqstandyq aktrısa Samal Eslıamovany Kann festıvalindegi jetistigimen quttyqtady, dep habarlaıdy QazAqparat tilshisi.

«71-shi Kann festıvaliniń halyqaralyq qazylar alqasy úzdik áıel róli atalymyn Qazaqstannyń týmasy Samal Eslıamovaǵa berdi. Samal Memlekettik teatr óneri ınstıtýtynda oqyǵan. 2008 jyly ol qatysqan alǵashqy fılm «Qyzǵaldaq» («Tıýlpan») rejısser Sergeı Dvortsevoıdy jetistikke jetkizdi. Ońtústik Qazaqstan oblysynda, Betpaqdalada túsirilgen sol kartına Kann festıvaliniń mańyzy jaǵynan ekinshi orynda turatyn «Erekshe kózqaras» Gran-prıin jeńip aldy», - dep jazdy mınıstr Feısbýktegi paraqshasynda.

Onyń aıtýynsha, «Aıka» fılmin túsirýge túrli elderdiń 5 kınokompanııasy qatysqan.

«Araǵa týra 10 jyl salyp, Dvortsevoı men Eslıamova «Aıka» fılmi jetistigin qaıtalady. Ony 5 kınokompanııa: Sergeı Dvortsevoıdyń «Kınodvor» stýdııasy, sondaı-aq Germanııa, Polsha, Qytaı jáne Qazaqstan kınokompanııalary túsirdi. Shyǵarmashylyq tandemdi quttyqtaımyn! Sizderge tabys, jańa jeńister tileımiz!», - dedi A. Muhamedıuly.

Eske sala keteıik, qazaqstandyq aktrısa Samal Eslıamova 71 Kann kınofestıvalinde óz atalymy boıynsha úzdik dep tanylǵan bolatyn.

«Aıka» atty kınotýyndyda Qyrǵyzstannan Máskeýge zańsyz kelip, turyp jatqan mıgrant qyzdyń ómiri sýretteledi. Ondaǵy basty róldi Samal Eslıamova somdaıdy.