Mınıstr memlekettik shekarany kesip ótý tártibine engizilgen ózgerister týraly aıtty

NUR-SULTAN. QazAqparat - Qazaqstan aýmaǵynda koronavırýs ınfektsııasynyń paıda bolýy men taralýyna jol bermeý jónindegi vedomstvoaralyq komıssııa 2 aqpanda Qazaqstan Respýblıkasynyń Memlekettik shekarasyn kesip ótý tártibine ózgerister engizdi. Bul týraly búgin Ortalyq kommýnıkatsııalar qyzmetinde Densaýlyq saqtaý mınıstri Alekseı Tsoı málim etti, dep habarlaıdy QazAqparat tilshisi.

«Shekara mańy aýdandarynda epıdemıologııalyq jaǵdaıdyń turaqtanýyna baılanysty 2021 jylǵy 2 aqpannan bastap QR aýmaǵynda koronavırýs ınfektsııasynyń taralýyna jol bermeý jónindegi vedomstvoaralyq komıssııanyń sheshimimen QR Memlekettik shekarasyn kesip ótý tártibine birqatar jeńildikter engizildi»,-dedi A.Tsoı.

Qazaqstan azamattary úshin, sonymen birge sheteldikter men azamattyǵy joq adamdar úshin de shekarany kesip ótý jıiligi 3 esege (90 táýlikte 1 retten 30 táýlikte 1 retke deıin) ulǵaıtyldy.

Erekshe jaǵdaılarda: emdelýge, oqýǵa barý, qyzmetpen, otbasy múshelerin jerleýge, otbasyndaǵy jaǵdaıy aýyr naýqasqa kútim jasaý, jolaýshy tasymaly, halyqaralyq tasymal úshin shekteý joq.

Qazaqstan Respýblıkasy Úkimetiniń sheshimi boıynsha tikeleı áýe qatynasy qaıta qalpyna kelgen (turaqty, turaqty emes charterlik reıster) memleketterge sheteldikterdiń shyǵýyna, Qazaqstan Respýblıkasynyń aýmaǵyna kirýine/aýmaǵy arqyly tranzıtpen ótýine ruqsat etiledi.