Mınıstr: maýsymdyq allergııa vaktsınatsııaǵa qarsy medıtsınalyq kórsetkish emes

NUR-SULTAN. QazAqparat – QR Densaýlyq saqtaý mınıstri Ajar Ǵınııat maýsymdyq allergııasy barlarǵa nege vaktsına egýge bolatynyn túsindirdi, dep habarlaıdy QazAqparat tilshisi.

«Maýsymdyq allergııalar vaktsınatsııaǵa qarsy medıtsınalyq kórsetilim bolyp eseptelmeıdi. Qarsy kórsetilim bolý úshin aýyr allergııalyq aýrý bolýy kerek. Qarapaıym eritindiniń ózine reaktsııa beretin jaıttar da bolady. Dáriger ár emdelýshini qarap, qujattaryn teksergen kezde aýyr allergııalyq aýrýy bar ma, ekpege qarsy reaktsııasy bar ma, anyqtaıdy. Maýsymdyq allergııa bolǵan jaǵdaıda emdelýshiniń densaýlyǵynda kúrdeli aýytqý bolmasa, qan taldamasy qalypty bolsa, dáriger ár jaǵdaıdy jeke qarap, vaktsı n atsııaǵa jiberý týraly sheshim qabyldaıdy dep oılaımyn», -dedi Ajar Ǵınııat.

Mınıstrdiń málimeti boıynsha, elordada memlekettik qyzmetkerlerdiń koronavırýs juqtyrýy jıilegen.

«Biz Prezıdent is basqarmasynyń medıtsınalyq qyzmetinen statıstıka alyp otyramyz. Memlekettik qyzmetshilerdiń densaýlyǵyn sol qyzmet qadaǵalaıdy. Memlekettik qyzmetshiler arasynda ósim bar ekenin kórip otyrmyz. Nur-Sultannyń «sary» aımaqqa kirgenin bilesizder. Buǵan deıin 10-ǵa jetpeıtin saýsaqpen sanarlyq jaıttar tirkelip kelgen. Qazir memlekettik qyzmetshiler arasynda táýlik saıyn naýqastanýdyń 100 jaǵdaıy tirkeledi», - dedi vedomstvo basshysy.