Mınıstr laýazymynan bosatylǵandar nelikten vıtse-premer qyzmetinde qaldy

ASTANA. QazAqparat – Premer-Mınıstrdiń orynbasary – Qarjy mınıstri Erulan Jamaýbaev keıbir Úkimet músheleri ne sebepti mınıstr laýazymynan bosatylyp, vıtse-premer qyzmetinde qalǵanyn túsindirdi, dep habarlaıdy QazAqparat tilshisi.

«Bul turǵyda saıası sheshim jasaldy. Buǵan deıin mınıstrlikte de, jalpy Úkimettegi de jumysyn qatar alyp júrgen áriptesterime naqty bir baǵytta jumys isteýine múmkindik jasalyp otyr. Óıtkeni olar issaparmen kóp júredi», - dedi E. Jamaýbaev Parlament Májilisinde tilshiler suraǵyna jaýap bere otyryp.

Bul rette spıker Úkimet basshysynyń orynbasary Serik Jumanǵarın jaqynda Saýda mınıstri laýazymynan bosatylǵanyn eske saldy.

«Serik Maqashuly (Jumanǵarın) kóbine issaparda bolady. Osy rette ol mınıstr retinde óz salasyna qaraýǵa kóp ýaqyt bóle almaıdy. Sondyqtan jaqynda bolǵan ózgeristerdi durys dep sanaımyn», - dedi E. Jamaýbaev.

Eske salsaq, Memleket basshysynyń Jarlyǵymen Serik Jumanǵarın Qazaqstan Respýblıkasy Premer-Mınıstriniń orynbasary bolyp taǵaıyndaldy, ol mınıstr laýazymynan bosatyldy.

Sonymen qatar Tamara Dúısenova Eńbek jáne halyqty áleýmettik qorǵaý mınıstri qyzmetinen bosatylyp, Premer-Mınıstr orynbasary laýazymynda qaldy.