Mınıstr: Latyn álipbıinde 0-synyptan oqytý 2019 jyly pılottyq jobada bastalady
Endigi kezekte, BǴM 2019 jyly mektep qabyrǵasyna keletin nólinshi synyp oqýshylarynyń barlyǵyn latyn álipbıine oqytýdy bastap ketpek. BǴM-niń bul ustanymy búgin Astanada respýblıkadaǵy barlyq bilim basqarmalary ókilderiniń basyn qosqan Erlan Saǵadıev bildirdi, dep habarlaıdy «QazAqparat» HAA tilshisi.
«Aldaǵy ýaqytttaǵy mınıstrliktiń ustanymdary týraly aıtyp óteıin. Eń aldymen, mektepke deıngi bilim boıynsha... Bizdiń mektepterge nólinshi synypty engizý jospar boıynsha 2019 jylǵy oqý jylynda bastalady. Oqýlyqtar qazirgi ýaqytta saraptamada. Biraq, bizdiń oıymyzsha nólinshi synypty latyn álipbıimen bastap ketý kerek. Sebebi, 2019 jyly 400 myńǵa jýyq balaǵa oqýlyqtardy kırıll qarpinde basyp, eki jyldan keıin taǵy latyn álipbıimen basý kóptegen shyǵynǵa ákeledi. Biz osy usynyspen Úkimetke shyqtyq. Olar bizdi qoldap jatyr», - deıdi QR Bilim jáne ǵylym mınıstri Erlan Saǵadıev.
Onyń aıtýynsha, qazirgi ýaqytta oqýlyqtardy latyn álipbıine aýdarý úshin tórt arnaıy top qurylyp, jumys júrgizip jatyr. Onyń ekeýin Saǵadıevtyń ózi basqaryp otyr eken.
«Tórt top Premer-Mınıstrdiń tóraǵalyǵymen ótetin ulttyq komıssııaǵa enedi. Osy komıssııaǵa usynystarymyzben shyǵyp otyrmyz. Endi sol tórt top birneshe aı jumys istep, 5 aıdyń ishinde sońǵy naqty sheshimge kelý kerek. Jazdyń basyna deıin bul josparǵa saı bir sheshimge kelemiz. Ýaqyt óte tyǵyz. Sondyqtan, jańa oqýlyqtar saraptamadan ótpese, biz latyn álipbıinde nólinshi synypty oqytýdy 2019 jyly tek pılottyq joba retinde bastaımyz dep otyrmyz. Onda nólinshi synyp tek 2020 jyly ǵana engiziletin bolady. Mınıstrliktiń ustanymy men usynysy osyndaı», - deıdi ol.
Erlan Saǵadıev eger muǵalimderdi daıyndap, oqýlyqtarǵa durys saraptama jasaı bilse jospar iske asatynyn aıtady.
«Eger osy sharýalardy iske asyryp úlgermesek onda 2020 jylǵa kóshirýdi kózdeýdemiz. Meniń oıymsha úlgermeıtin sekildimiz. Onda 2019 jyly pılottyq joba retinde oblystardaǵy eki-úsh mektepten engizýge bolady», - dep túıdi Erlan Saǵadıev.