Mınıstr Qurylys kodeksine qatysty shyqqan daýǵa taǵy pikir bildirdi

<p>ASTANA. KAZINFORM &ndash; Ónerkásip jáne qurylys mınıstri Qanat Sharlapaev Úkimet otyrysynan keıin ótken baspasóz máslıhatynda Qurylys kodeksiniń aınalasyndaǵy daý týraly pikir bildirdi.</p>

«Máseleniń praktıkalyq jaǵyna toqtalyp óteıik. Qarjy mınıstrligi aýdıt júrgizgen bolatyn. Osy aýdıt aıasynda zań buzý faktisi anyqtalǵan joq. Qarjy mınıstrligindegilerdiń jalǵyz aıtqany – protsedýralyq sáıkessizdikter bolǵan. Biraq qarjylyq zań buzý faktisi bolmaǵan. Protsedýralyq sáıkessizdikter úshin tıisti qyzmetkerler tártiptik jaýapkershilikke tartyldy. Budan basqa aıtarym joq», - dedi ol jýrnalıstiń suraǵyna bergen jaýabynda.

Sondaı-aq, túptiń túbinde Qurylys kodeksiniń jańa redaktsııasy qabyldanatyna senim bildirdi.

«Al kodeksti qabyldaý máselesine kelsek, qazir belsendi jumys júrip jatyr. Eki jyldan beri talqylanyp kele jatqanyn eskersek, qorytyndy talqylaýdan keıin qabyldanady dep oılaımyn», - dedi Qanat Sharlapaev.

Eske salaıyq, Májilis depýtaty Baqytjan Bazarbek Ónerkásip jáne qurylys mınıstrligi Qurylys kodeksiniń jobasyn ázirleý kezinde búrkemelengen zań buzý faktisine jol bergenin aıtyp júr. 

Al Premer-mınıstr Oljas Bektenov Májilis depýtaty Baqytjan Bazarbektiń Qurylys kodeksiniń jobasyn ázirleý kezinde zańsyzdyqtarǵa jol berilgeni týraly saýalyna jaýap bergen bolatyn.