Mınıstr kúnbaǵys eksportyna baj salyǵyn belgileýdiń táýekelderin atady
«Biz shilde aıyna deıin kúnbaǵysty syrtqa shyǵarýǵa, maýsym aıyna deıin tazartylmaǵan kúnbaǵys maıyn syrtqa shyǵarýǵa sáıkesinshe 140 myń jáne 125 myń tonna kóleminde kvota engizgenbiz. Sondyqtan, ishki naryq shıkizatpende, óndirispen de qamtylǵan. Ózge elderge qarasańyzdar, kúnbaǵys maıynyń quny 3-4 ese qymbattaǵan. Osy qabyldanǵan sharalardyń arqasynda baǵa aıtarlyqtaı turaqty», - dedi ol Májilistiń jalpy otyrysynan keıin BAQ ókilderine bergen suhbatynda.
Sondaı-aq, mınıstr ónimderin erkin eksporttaı almaı otyrǵan kúnbaǵys tuqymyn óndirýshilerdiń shaǵymy týraly pikir bildirdi.
«Syrtqa shyǵaryp satsaq, tonnasyna 350-400 myń teńge alar edik. Al bizdegi zaýyttar 240-250 myń teńge ǵana tóleıdi» dep otyr. Biz bul máseleni zerttep jatyrmyz. Birinshi aıtarym, biz ózimizde óndiriletin tuqymnyń bárin syrtqa satyp jiberip, ózimiz tuqymsyz qala almaımyz. Kezinde Túrkııadan kúnbaǵysty 4-5 ese qymbatqa satyp alǵan kezderimiz bolǵan. Osyǵan baılanysty bizge teńgerimdi tabý kerek. Qazir izdep jatyrmyz. Kúnbaǵys maıyn óndirýshilermen bólek, tuqym óndirýshilermen bólek sóılesip otyrmyz.
Ázirshe kvota bar. Jazǵa qaraı endi ne isteıtinimizdi qaraımyz. Bul jerde eki joly bar. Ne baj salyǵyn engizemiz. Biraq baj salyǵyn engizý baǵanyń odan ári ósip ketpeýine kepildik bere almaıtynyn aıtqym keledi. Talap áketken kezde áreket etip úrgermeı de qalamyz. Budan kim utady? Shartty túrde aıtsaq, kúnbaǵys maıy men tuqymyn shyǵarýǵa 100 dollar kóleminde baj salyǵyn engizdik, bıýdjetke 40 mlrd teńge tústi deıik. Al ózimizde kúnbaǵys bolmaı qalady. Teńgerim tabýymyz kerek dep otyrǵanym osy», - dedi Erbol Qarashókeev.
Buǵan deıin QR Premer-Mınıstriniń orynbasary – Saýda jáne ıntegratsııa mınıstri Baqyt Sultanovtyń eldegi 127 kóterme jáne bólshek saýda bazarynda baǵany baqylaýǵa arnalǵan tekserýler júrip jatqanyn málim etkenin jazǵan bolatynbyz.