Mınıstr kólik salasynda paıda bolyp jatqan jańa mamandyqtardy atady

<p>ASTANA. KAZINFORM &mdash; Kólik mınıstri Marat Qarabaev Úkimet otyrysynda keleshekte kólik-logıstıka salasynda qajet bolatyn mamandyqtardy atady.</p>

— Eldiń kólik-logıstıka kesheniniń jyldam damýyn eskere otyryp, orta merzimdi perspektıvada 25 jańa mamandyqqa suranys paıda bolady dep kútilýde.
Mysaly, jańa jobalardy iske asyrý barysynda avtomobıl joldaryn BIM tehnologııasy boıynsha jobalaý jáne qaıta qurý qarastyrylǵan. Bul tsıfrlyq jobanyń analogyn paıdalaný men 3D modeldeýdi talap etedi, — dedi ol.

Mınıstrdiń aıtýynsha, keleshekte «aqyldy joldardy» jobalap, basqaratyn mamandyqtarǵa suranys artpaq. 

— Bul baǵytta «aqyldy joldar» boıynsha tıisti ınjener-jobalaýshylar, BIM tehnologııasynda jumys tájirıbesi bar prorabtar, qurylys robottarynyń operatory jáne tsıfrlyq jobalaýshy qajet bolady. Búgingi kúni kólik-logıstıka salasyndaǵy iri toraptardy basqarý úshin tsıfrlyq logıstıkalyq kartalar konstrýktory men operatory qajet. Avıatsııalyq júıelerdi qashyqtan basqaratyn syrtqy ushqysh suranysqa ıe, — dedi Marat Qarabaev.

Eske salsaq, Prezıdent Jarlyǵymen 2025 jyl Jumysshy mamandyqtarynyń jyly dep jarııalanǵan edi.

Osyǵan deıin Ónerkásip jáne qurylys mınıstri Qanat Sharlapaev Úkimet otyrysynda qurylys pen metallýrgııa salasynda paıda bolǵan jańa mamandyqtardy atady.