Mınıstr Qazaqstanda oqyǵysy keletin reseılik stýdentterge qatysty pikir bildirdi

ASTANA. QazAqparat – Bıyl mamyr-qyrkúıek aralyǵynda shetel asyp bilim alyp jatqan 2,5 myńnan astam otandyq stýdent bilimin elde jalǵastyrý úshin qaıta oraldy. Bul týraly QR Joǵary bilim jáne ǵylym mınıstri Saıasat Nurbek málim etti, dep habarlaıdy QazAqparat tilshisi.

«Stýdentterdiń aýysýy halyqaralyq standarttarǵa sáıkes júzege asyrylady. Ózderińiz biletindeı, biz Bolon protsesiniń múshesimiz. Sondaı-aq, joǵary bilim berý boıynsha birneshe halyqaralyq kelisimshart bar. Kelisimderge sáıkes shetel stýdenti Qazaqstanǵa aýysyp oqımyn dese, biz oǵan shekteý qoıa almaımyz. Shetel stýdentterin qabyldaýdy joǵary oqý oryndary ózderi ótkizedi», - dedi Saıasat Nurbek tilshilerdiń suraǵyna jaýap bere turyp.

Mınıstrdiń aıtýynsha, shetel stýdentterin qabyldaýǵa qatysty bir ǵana talap bar. Qabyldaý protsesi oqý kezinde emes, demalys, ıaǵnı kanıkýlda júzege asýy tıis.

Joǵaryda atalǵan talap shetelde oqyp jatqan qazaqstandyq stýdentterge qatysy joq. Saıasat Nurbektiń málimdeýinshe, sheteldegi otandyq stýdentter elge kez kelgen ýaqytta orala alady.

«Sońǵy ýaqytta shetelde oqyp jatqan bizdiń jerlesterimiz Qazaqstanǵa oralýǵa jıi nıet tanytyp jatyr. Bıyl mamyr-qyrkúıek aıy aralyǵynda 2,5 myńnan astam shetelde bilim alyp jatqan qazaqstandyq stýdent elge qaıtyp keldi», - deıdi ol.

Sondaı-aq, vedomstvo basshysy Qazaqstanda oqyǵysy keletin stýdentterdiń deni Reseıden ekenin tilge tıek etti.

Buǵan deıin habarlaǵanymyzdaı elimizde JOO-ǵa arnalǵan ınklıýzıvti bilim berý tujyrymdamasyn ázirleý qolǵa alyndy.