Mınıstr Qarashókeev: Shegirtkeden myńdaǵan gektar zardap shegip jatqany – jalǵan

ASTANA. QazAqparat – Búgin Úkimet otyrysynan keıin Aýyl sharýashylyǵy mınıstri Erbol Qarashókeev Qostanaı oblysynyń egis alqaptaryndaǵy shegirtkege qatysty túsinik berdi, dep habarlaıdy QazAqparat tilshisi.

«Keshe áleýmettik jelilerde shegirtkege qatysty bir vıdeo tarady. Ol vıdeo Jalgeldın aýdanyndaǵy bir seriktestiktiń jerinde túsirilgen. Bul rette myńdaǵan gektar egis alqaby zardap shegip jatyr degen qaýeset shyndyqqa janaspaıdy. Ol jerde bizdiń mamandar, mınıstrlik basshylyǵy boldy. Osy oraıda der kezinde tıisti sharalar jasalyp, shegirtkeni ýlaý dárileri jetkilikti kólemde jetkizildi. Sondyqtan jaǵdaı turaqty, 500 gektar alqap zardap shekti», - dedi E. Qarashókeev.

Onyń aıtýynsha, shegirtkeniń taralýymen kúres boıynsha jumystar barlyq oblysta iske asyrylyp jatyr.

«Bul jumystar jyl saıyn atqarylady. Jaǵdaı baqylaýymyzda. Sondyqtan shegirtke joıylyp, taralýy toqtady. Shegirtke paıda bolsa, sol jerge mamandardy jiberip, dári sebý iske asyrylady. Sondyqtan áleýmettik jelilerde otyrǵan adamdarǵa bir ótinishim bar: tekserilmegen, jalǵan aqparatty jeli arqyly taratpańyzdar dep aıtqym keledi. Málimetti Aýyl sharýashylyǵy mınıstrligi der kezinde jarııalap otyrady», - dedi mınıstr.

Budan buryn Qostanaı oblysynda sharýalar shegirtkeden orasan zor zııan kórip otyrǵany habarlanǵan edi.