Mınıstr Qarabaev kólikke minip, 4 oblys joldaryn tekserip shyqpaq

ASTANA. QazAqparat — Kólik mınıstri Marat Qarabaev kólik ınfraqurylymy obektilerin tekserý úshin avtomobılmen 4 óńirdi aralap shyqpaq. Bul týraly mınıstrdiń baspasóz hatshysy Janjigit Omarhan Facebook-paraqshasynda jazdy, dep habarlaıdy QazAqparat tilshisi.

«Búgin vedomstvo basshysy Almaty oblysyna keldi. Eń aldymen, Shamalǵan stantsııasynyń aınalma jolynyń qurylysyn jáne «Saryózek – Kóktal» (45-68 km) avtojolynda júrip jatqan kúrdeli jóndeý jumystaryn tekseredi. Sondaı-aq mınıstr «Qorǵas» qurǵaq portynyń jumysymen tanysyp, «Almaty – Qorǵas» avtojolynyń sapasyn baǵamdap qaıtýdy josparlap otyr», — dep jazdy ol.

Baspasóz hatshysynyń habarlaýynsha, mınıstrlik basshysy Marat Qarabaev demalys kúnderin paıdalanyp, Jetisý, Abaı jáne Shyǵys Qazaqstan oblystaryna da barady. Almaty oblysynan Óskemenge deıin avtokólikpen júrip ótip, mınıstr atalǵan óńirlerdegi jol qurylystaryn, kólik obektilerin qaıta jańartý jumystaryn, kólik qozǵalysyna arnalǵan kópirlerdiń jaı-kúıin tekseredi.