Mınıstr ındýstrııalandyrý baǵdarlamasy boıynsha 3 mańyzdy máseleni atady
Búgin Májiliste «2010-2014 jyldarǵa arnalǵan Údemeli ındýstrııalyq-ınnovatsııalyq damý baǵdarlamasyn iske asyrý barysy» taqyrybynda ótken Úkimet saǵatynda Indýstrııa jáne jańa tehnologııalar mınıstri Áset Isekeshev osylaı málim etti.
«Eń aldymen ındýstrııalandyrý baǵdarlamasy boıynsha úsh mańyzdy máselege nazar aýdarǵym keledi. Birinshi másele - kóptegen sarapshylar ındýstrııalyq baǵdarlamany jobalar jıyntyǵy ǵana dep túsinedi. Negizinde bul olaı emes. Indýstrııalyq baǵdarlama - bul asa salmaqty, uzaqmerzimdi júıeli prezıdenttik baǵdarlama. Munaı men shıkizat taýsylar, sol kezdegi ekonomıkanyń qýatyn kóterip áketetin munaıdan táýelsiz damýdyń dańǵyl joly bolýy shart. Sondyqtan da, bul sektor qýatty ári ornyqty bolýy shart. Bul baǵytta eski ónerkásiptik bazalar jańǵyrtylyp, ınvestorlar, ınnovatsııalar úshin jaǵdaı jasalady. Budan bólek, otandyq jumys kúshi osyǵan daıarlanyp, qajetti ınfraqurylymdar qurylýy shart. Eń bastysy ındýstrııalandyrý baǵdarlamasy arqyly elimizde, bızneste jáne qoǵamda jańa ekonomıkalyq oı qalyptastyrylýy qajet», - deıdi mınıstr. Onyń aıtýynsha, osyǵan oraı ındýstrııalandyrý baǵdarlamasy jobalardan ǵana týyndamaıtyn asa mańyzdy mindet bolyp tabylady.
Mınıstr «ındýsıtrııalandyrý - barsha ekonomıkalyq saıasatty almastyrady» degen pikirdi de joqqa shyǵardy. «Biz kóbinese keıbir óńirlerde ındýstrııalyq jobalardyń bolmaı otyrǵandyǵy týraly syndy estip jatamyz. Árıne, bul jerde túsinýge tıisti basty másele - bizde adamı jáne materıaldyq resýrstardyń bári birdeı jetkilikti emes. Sondyqtan da, ındýstrııalyq baǵdarlamanyń basty maqsaty - qosymsha qun salyǵy joǵary, eksportqa baǵdarlanǵan salanyń qýatyn arttyrýǵa negizdeledi. Sol úshin barlyq salada jáne barlyq óńirde «chempıon» bolý esh múmkin emes. Solaı bola tura keıbir óńirlerge jetkilikti nazar aýdarylmaıdy deýge de bolmaıdy. Óıtkeni, elimizdiń barsha óńirleri memlekettik ekonomıkalyq saıasat sheńberinde (máselen monokaqalar baǵdarlamasy) retteletin bolady», - deıdi Áset Isekeshev.
Sonymen qatar, mınıstr kútiletin nátıjelerge de basa nazar aýdarylatynyn jetkizdi. «Biz keı jaǵdaıda «nege baǵdarlama júzege asqan 2 jyl ishinde Qazaqstan Malaızııa men Sıngapýr bola almady?» degen suraqtardy da estip qalamyz. Árıne, bir jobany júzege asyrýǵa birneshe jyldarǵa sozylatyn daıarlyq qajet bolatynyn bıznesmender jaqsy biledi», - dedi mınıstr.
Onyń aıtýynsha, 2020 jylǵa deıingi strategııalyq jospar eki besjyldyq arqyly júzege asady. Onyń ishinde birinshi besjyldyqta ındýstrııalyq ınnovatsııalyq damý baǵdarlamasyna barynsha kúsh salynady. «Árıne, bul kezeńde ekonomıkalyq saıasattyń basqa da elementteri barshylyq, onyń ishinde salalyq baǵdarlamalarǵa da nazar aýdarylady», - dedi vedomstvo basshysy.