Mınıstr G.Ábdihalyqova UOS ardagerleriniń úılerinde bolyp, olarǵa mereıtoılyq medaldardy tabys etti
Mınıstr at basyn tiregen úılerdiń alǵashqysy - ardager-artıllerıst Japparqul Baıymbetovtiń úıi boldy. Búginde 91 jasty alqymdap otyrǵan qarııa 1939 jyly ásker qataryna shaqyrtylyp, mindetin óteýdi Ýkraına KSR-niń Lvov qalasynda bastaıdy. Fın soǵysyna qatysqannan keıin ol, Lvov qalasyna qaıta attandyrylyp, 1941 jyldyń naýryz aıynan bastap UOS bastalǵanǵa deıin Keńes Odaǵy men Rýmynııa arasyndaǵy shekarada boryshyn óteıdi. UOS ýaqytynda Zaporoje qalasynyń túbindegi maıdanda jarylǵan mınadan jaraqattanady da, uzaq emnen keıin úıine oralady.
Ardager Jeńis kúni qarsańynda astanalyq 55 maıdangermen birge jańa úıden páter kiltin alatyn boldy.
Bıyl 88 jasqa tolatyn Gleb Moıseev bolsa, soǵystyń bastalǵanyn ken ornynda jumys istep júrip estigenin aıtady. Alǵashqy ýaqytta Don ózeni jaǵalaýynda, odan keıin Stalıngrad qalasyn jaýdan azat etýge qatysqan. 1943 jyldyń qańtar aıynda jaralanǵan.
G.Ábdihalyqova ardagerlerge jyly lebizderin bildirip, olarǵa Jeńistiń 65 jyldyǵyna arnalǵan mereıtoılyq medaldarmen birge, syıǵa teledıdar tartý etti.
«Bıyl Jeńistiń 65 jyldyq mereıtoıy. Eshbir ardager iltıpatsyz qalmaý kerektigi týraly Elbasy óz sózinde árdaıym aıtady. Eń bastysy - kóńil bólý, odan keıin berilgen tapsyrmalarǵa sáıkes, tıisti tólemderin berý jáne emdeý-saýyqtyrý jaǵdaılaryn jasaý. Qazir osy sharalar respýblıka boıynsha jergilikti jáne memlekettik organdarda atqarylyp jatyr», - dedi vedomstvo basshysy.