Mınıstr et óńdeý kásiporyndarynyń problemasyn aıtty

ASTANA. QazAqparat – Et óńdeý kásiporyndary tıimdi baǵada shıkizat ala almaı otyr. Bul týraly Senatta ótip jatqan Úkimet saǵatynda Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

Azyq-túlik ónimderi óndirisiniń jalpy kólemindegi et ónimderiniń úlesi 16%. Et óńdeıtin 171 kásiporyn jumys istep tur. Salqyndatylǵan et boıynsha ishki naryqty qamtamasyz etý – 117%, shujyq ónimderi – 61%, et konservilerine qatysty 26% qurady

, - dedi E. Qarashókeev.

Onyń aıtýynsha, et óńdeý kásiporyndary tıimdi baǵada shıkizatty ala almaı otyr. Sonymen qatar osy kásiporyndarda aınalym qarajaty jetkiliksiz.

Budan basqa, tıimdi baǵamen beriletin shıkizatpen qamtamasyz etý úshin et óńdeý kásiporyndaryna muzdatylǵan etti bajsyz ákelýge kvota beriledi. Et salasyn damytý úshin kásiporyndardyń qurylysy men ony jańǵyrtý shyǵyndarynyń bir bóligin óteý boıynsha ınvestıtsııalyq sýbsıdııa, kredıt jáne lızıng boıynsha syıaqy mólsherlemesin tómendetý, asyldandyrý jumystary men mal sharýashylyǵy óniminiń ónimdiligi men sapasyn sýbsıdııalaý sııaqty barlyq sharalar saqtalǵan

, - dedi mınıstr.