Mınıstr «Ertis ormany» rezervatyndaǵy órt týraly: jaǵdaı baqylaýda

ASTANA. QazAqparat – Tótenshe jaǵdaılar mınıstri Syrym Sháriphanov Pavlodar oblysy «Ertis ormany» rezervatyndaǵy órtke qatysty sońǵy málimetterdi jarııalady, dep habarlaıdy QazAqparat tilshisi atalǵan vedomstvonyń baspasóz qyzmetine silteme jasap.

«Qazir jańa kúsh keldi, jaǵdaıdy tolyq baqylaýǵa alamyz. Órttiń oshaqtary kontýr boıynsha sóndiriledi. Avıatsııa tańerteńnen daıyn tur. Tikushaq iri órt oshaqtaryn sóndirýge jumyldyrylady. Tikushaq irkilissiz jumys isteýi úshin oblys ákiminiń sheshimimen janar-jaǵarmaı beketi uıymdastyryldy. Sol arqyly ýaqyt únemdeledi, tıisinshe tikushaq sýdy molyraq shashady. Jalpy jaǵdaı baqylaýda» - dedi Syrym Sháriphanov.

Buǵan deıin «Ertis ormany» rezervatynda órt shyqqany týraly habarlaǵan edik.

QR Tótenshe jaǵdaılar mınıstrligi baspasóz qyzmetiniń habarlaýynsha, 15 shilde kúni Sharbaqty aýdanynyń Stepnoe jáne Baýyrtal ormanshylyqtarynda ormannan órt shyqty.

Tótenshe jaǵdaılar mınıstri men oblys ákimi aýmaqty áýeden barlady. 98 oramdaǵy órt erekshe baqylaýda, onda órt kúsheıip bara jatqany habarlandy.