Mınıstr elimizde áýe bıletteriniń baǵasyn tómendetý joldaryn atady

NUR-SULTAN. QazAqparat – Indýstrııa jáne ınfraqurylymdyq damý mınıstri Beıbit Atamqulov Qazaqstanda áýe bıletteriniń baǵasy qalaı tómendetiletinin aıtty, dep habarlaıdy QazAqparat tilshisi.

«Memleket basshysy óz Joldaýynda keıbir áýe kompanııalardyń bılet quny qymbat ekenin atap ótken bolatyn. Sondyqtan mınıstrlik osy baǵytta júıeli jumystardy júrgizip otyr. Áýe bılet quny birinshi kezekte áýe tasymaldaryna baǵa belgileýdiń (básekelestik, suranys, maýsymdyq, mereke jáne demalys kúnderi) naryqtyq jáne dınamıkalyq mehanızmine, avıaotyn jáne jolaýshylar aǵynynyń deńgeıine baılanysty. Memleket baǵany tikeleı rettemeıdi, tek avıakompanııalar úshin básekege qabiletti jaǵdaılardy jasaıdy. Básekeniń arqasynda ǵana biz avıabılet qunyn tómendetemiz», - dedi Beıbit Atamqulov Úkimet otyrysynda.

Mınıstrdiń aıtýynsha, memlekettiń óz naryǵyn baqylap, tıisti qadaǵalaýdy júzege asyrýy tıis. Sondyqtan mınıstrlik keshendi sharalardy qabyldap jatyr.

«Birinshiden, 2012 jyldan bastap ishki baǵyttar boıynsha qazaqstandyq áýe akompanııalardyń turaqty jolaýshylar reısterin oryndaýyna barlyq shekteýler alyp tastaldy. Eń tanymal úsh marshrýtta 4 áýe tasymaldaýshysy ár túrli tarıftik usynystarmen ushýdy oryndaıdy. Bul shara avıabıletter qunyn tómendetýge yqpal etti. Mysaly, eger 2012 jyly Nur-Sultan-Almaty baǵyty boıynsha ortasha bılet quny 85 dollardy qurasa, 2019 jyly bılet quny – ortasha alǵanda 50 dollardy qurady. Ekinshiden, mamyrda alǵashqy ulttyq loýkoster Fly Arystan iske qosyldy. Onyń bılet quny «Eır Astanamen» salystyrǵanda 2 ese tómen. Búgingi kúni 470 myńnan astam bılet satyldy, 60 % bıletterdiń quny 10 myń teńgeden tómen», - dedi ol.

Atamqulovtyń aıtýynsha, mınıstrlik tikeleı óndirýshiden sońǵy tutynýshyǵa deıin avıaotyndy jetkizý tizbegin ońtaılandyrady.

«Ulttyq ekonomıka mınıstrligi múddeli memlekettik organdarmen birlesip avıaotyn baǵasyn ashyq belgileý jáne ony úzdiksiz jetkizý boıynsha teń qoljetimdilikti qamtamasyz etý mehanızmderin ázirleıdi. Munaı óńdeý zaýyttaryn jańǵyrtý arqyly osy jyly óndiriletin avıaotyn kólemi 694 myń tonnany quraıdy. Bul avıatsııalyq naryq qajettiligin (700 myń tonna) tolyǵymen jabýǵa múmkindik beredi», - dedi ol.

Eske sala ketsek, búgingi Úkimet otyrysynda Asqar Mamın qazaqstandyq azamattyq avıatsııa salasyn damytýda birqatar tapsyrmabergen bolatyn.