Mınıstr dollar baǵamyna qatysty pikir bildirdi

<p>ASTANA. KAZINFORM &ndash; Úkimet otyrysynan keıingi brıfıngte Saýda jáne ıntegratsııa mınıstri Arman Shaqqalıev dollar baǵamyna qatysty pikir bildirdi.</p>

Brıfıng barysynda BAQ ókilderi mınıstrden: «Qazir 1 dollar 500 teńgege jetti. Bul el azamattarynyń tólem qabiletine áser ete me? Saýda mınıstri retinde pikirińizdi bildirseńiz jáne Qazaqstan qandaı taýardy shetelden satyp almaý múmkin? Óıtkeni, dollar qymbat», - dep suraǵan edi.

Mınıstr máseleniń óte ózekti ekendigin jasyrǵan joq. Onyń atap ótýinshe, dollar baǵamyna makroekonomıkalyq faktorlar áser etedi. Al Qazaqstannyń ımporty negizinen Eýrazııalyq ekonomıkalyq odaq elderimen jáne Qytaımen arada júredi.

«Olarmen dollarmen esep aıyryspaımyz. Mysaly, Reseımen rýbl-teńgemen, al Qytaımen ıýan-teńgemen esep aıyrysamyz. Biz aptasyna bir ret monıtorıng jasaımyz. Osy aıda 0,2 paıyz ósimdi baıqadyq. Onyń dollarmen baılanysy joq. Ol maýsymaralyq úrdis», - dedi Arman Shaqqalıev.

Búgin Astana men Almaty qalalaryndaǵy aqsha aıyrbastaý pýnktterinde dollar 497-502 teńge aralyǵynda saýdalanyp jatqanyn jazǵan edik.