Mınıstr: Denıs Ten qandy kóp joǵaltqandyqtan qaıtys boldy

ASTANA. QazAqparat - QR Densaýlyq saqtaý mınıstri Eljan Birtanov sportshy Denıs Tenniń qazasy jáne dárigerler kómegi týraly aıtty, dep habarlaıdy QazAqparat tilshisi.

Búgin saǵat 14:16-da jedel járdem qyzmetine kóshede belgisiz adamnyń pyshaq jaraqatymen jatqany týraly habar kelip tústi. Eki mınýtta shaqyrý brıgadaǵa jiberildi jáne 10 mınýtta jedel járdem brıgadasy oqıǵa oryna jetti. 11 mınýtta naýqas jedel statsıonarǵa jetkizildi.Jedel járdem mashınasynda reanımatsııalyq sharalar jasaldy. Jol ústinde aýrýhanaǵa habar berilip, naýqasty hırýrgtar toby kútip aldy. Dárigerler birden ota jasap, eki saǵat boıy jansaqtaý bóliminde sportshynyń ómiri úshin kúresti. Biraq, qandy kóp joǵaltqandyqtan, 17:30-da Denıs Ten qaıtys boldy», - dep jaýap berdi mınıstr jýrnalıster suraǵyna «Nursáýlet» bıznes-ortalyǵynda.

Mınıstrdiń aıtýynsha, jedel járdemge habar berilgenshe sportshy kóp qan joǵaltqan. 

"Dárigerler tarapynan barlyq kómek tolyq kórsetildi. Biraq, jedel járdemge habar berilgenshe sportshy kóp qan joǵaltqan edi. Qannyń kóp ketýi qashanda ómirge qaýip tóndiretin faktorlardyń biri. Oqıǵanyń egjeı-tegjeıi patologoııalyq-anatomııalyq zertteýden keıin anyqtalady", - dedi mınıstr.

Eske sala keteıik, Danıs Ten saǵat úshte pyshaq jaraqatyn alyp, Almatydaǵy ortalyq aýrýhanaǵa túsken. Oqys oqıǵa Qurmanǵazy-Baıseıitova kósheleriniń qıylysynda bolǵan.

Almaty ІІD bergen málimetterge qaraǵanda, sportshy kóliginiń aınasyn urlap bara jatqan eki adamnyń ústinen túsken. Eki arada bastalǵan janjaldyń nátıjesinde álgi adamdar Denıs Tendi pyshaqtap ketken. 

Ókinishke qaraı, 17:30-da Tenıs Ten qaıtys boldy.