Mınıstr dárigerlerdiń quqyǵyn qorǵaýda qandaı ózgerister bolatynyn aıtty

NUR-SULTAN. QazAqparat – Úkimet otyrysynan keıin BAQ ókilderiniń suraqtaryna jaýap bergen QR Densaýlyq saqtaý mınıstri Ajar Ǵınııat medıtsına qyzmetkerleriniń quqyǵyn qorǵaý týraly zań jobasyndaǵy basty normalardy atady, dep habarlaıdy QazAqparat tilshisi.

«Mınıstrlik medıtsına mamandarynyń quqyǵyn qorǵaý týraly zań jobasyn ázirledi. Zańnyń ózi óte keshendi. Dárigerdiń mártebesi, jalpy medıtsına qyzmetkerlerin áleýmettik, materıaldyq qoldaý máselelerin kóteredi. Sondaı-aq, medıtsına qyzmetkerlerin áleýettik saqtandyrý máselesi de qozǵalǵan. Medıtsına qyzmetkerleriniń qorǵaýda bolýyn, medtsınalyq ıntsıdentter úshin dárigerler qylmystyq jaýapkershilik arqalamaýyn qarastyrǵan. Ol úshin árbir medıtsına mamany, tek dáriger ǵana emes orta medıtsınalyq qyzmetshi de óziniń kásibı qyzmetin saqtandyrý kompanııalary arqyly saqtandyratyn bolady», - dedi vedomstvo basshysy.

Zań jobasy boıynsha, emdelýshi men medıtsına mamandarynyń arasynda daý týyndasa, ol áýeli medıatsııa aıasynda qaralýy kerek.

«Medıtsınalyq ıntsıdent týyndaǵan jaǵdaıda aýrýhanalardyń janynan emdelýshilerdi qoldaý ortalyqtary jumys isteıdi. Sondaı-aq, emdelýshiniń shaǵymy nemese ótinishi medıatsııa arqyly qaralady. Medıatsııa aıasynda kelisim bolmaǵan jaǵdaıda bul ister saqtandyrý kompanııalaryna túsedi. Sol kompanııalar densaýlyqqa keltirilgen zalaldy ótep beredi», - dedi Ajar Ǵınııat.