Mınıstr Dálenov kólik salyǵyn tóleý merzimin aýystyrýdy usyndy

NUR-SULTAN. QazAqparat – Ulttyq ekonomıka mınıstri Rýslan Dálenov Salyq kodeksine ózgerister men tolyqtyrýlardy engizýdi kózdeıtin zań jobasy boıynsha senatorlar aldynda baıandama jasady, dep habarlaıdy QazAqparat tilshisi.

Rýslan Dálenovtyń aıtýynsha bul qujat ınvestıtsııa tartýdy yntalandyrýǵa, bıznes ortany damytyp, salyqtyq ákimshilendirýdi jaqsartýǵa baǵyttalǵan.

«Salyq elementterin ózgertpeı jeke tulǵalardyń múlik jáne jer salyqtaryn biriktirý usynylady. Eki salyq biryńǵaı tólemmen tólenedi. Bul rette kóp páterli turǵyn úılerdiń ıeleri úshin jer salyǵyn alyp tastaý usynylady. Sondaı-aq, salyq tóleýshilerge qolaıly bolý maqsatynda kólik salyǵyn tóleý merzimin osy jyldyń 31 jeltoqsanynan kelesi jyldyń 1 sáýirine aýystyrý usynylady», - dedi Rýslan Dálenov Parlament Senatynyń otyrysynda.

Sondaı-aq, Rýslan Dálenov ınvestıtsııalyq salyqtyq nesıeni engizý usynylyp otyrǵanyn jetkizdi.

«Nesıe korporatıvtik tabys salyǵy jáne múlik salyǵy boıynsha

3 jylǵa paıyzsyz beriletin bolady, biraq sharttar oryndalmaǵan jaǵdaıda ósimpul esepteledi. Maqtany qaıta óńdeýge, ashytqy, kondıterlik ónimder, qant qyzylshasynan qantty óndirýge eseptelgen qosylǵan qun salyǵynyń somasyn 70%-ke azaıtý boıynsha normany qoldaný usynylyp otyr. Bul aýyl sharýashylyǵy ónimderin qaıta óńdeýdi, otandyq taýar óndirýshilerdiń óndiris kólemin ulǵaıtýdy yntalandyrady. Eksport kezinde qosylǵan qun salyǵyn qaıtarý rásimin ońaılatý maqsatynda otandyq óndirýshiler úshin qosylǵan qun salyǵyn jeńildetilgen túrde qaıtarý quqyǵyn berý usynylady: ıaǵnı tekserýsiz – 50%, tekserýden keıin – 50%. Kólik quraldary men aýyl sharýashylyǵy tehnıkasynyń komponentterin óndirý úshin qosylǵan qun salyǵy boıynsha jeńildikti qoldaný usynylady. Bul otandyq avtokólikterdegi qazaqstandyq qamtý úlesin arttyrady», - dedi ol.