Mınıstr: Bıyldan bastap muǵalimder áýrege túsip portfolıo jınamaıdy

TALDYQORǴAN. QazAqparat - Muǵalimderdi attestattaý, portfolıo jınaý máselesi qaıta qaralady. Bul jóninde Oqý-aǵartý mınıstri Ǵanı Beısembaev Taldyqorǵanda aǵartý salasynyń mamandarymen ótken jıynda aıtty, dep habarlaıdy QazAqparat tilshisi.

«Budan bylaı muǵalimderdi testileý, attestattaý, áýrege salyp portfolıo jınatý máselesi qaıta qarastyrylady. Bıyldan bastap muǵalimder birinshi kezekte óziniń sanatyn dáleldeý úshin eshqandaı portfolıo jınaýmen aınalyspaıtyn bolady. Óıtkeni bul da - jemqorlyqqa ıtermeleıtin dúnıeler. Ananyń týystary baryp jalǵan sertıfıkat alyp alady eken, mynanyń týystary baryp orden, medal baryp alady eken. Sóıtip, aqsha tólep olardy jınaıdy. Al ol eshkimge kerek emes. Negizi attestatsııa - muǵalimniń jetistigi emes, muǵalimniń tabysy oqýshynyń jetistigi arqyly baǵalanýy kerek. Ekinshiden, muǵalim qalaı serıtıfıkat alamyn demeı, oqýshynyń bilimimen aınalysýy kerek. Al mınıstrlik oqýshysy jetistikke jetken muǵalimderdi syrttaı baqylaý arqyly avtomatty túrde onyń kategorııasyn ózimiz ákep berýimiz kerek», - dedi Oqý-aǵartý mınıstri Ǵanı Beısembaev.

Buǵan deıin mınıstr muǵalimderdi zańbuzýshylyqpen qabyldaý faktileri eń kóp tirkelgen aımaqtardy ataǵan bolatyn.

Mundaı jaǵdaı boıynsha Almaty oblysynyń Qarasaı aýdany kósh bastap tur.

Sondaı-aq Oqý-aǵartý mınıstri Ǵanı Beısembaev «Altyn belgi» alý úshin ata-analar túrli qýlyq-sumdyqqa baratynyn sóz etti.

Mınıstr oqýshylar arasyndaǵy tóbeleske pikir bildirip, birinshi kezekte ata-ana balasynyń tárbıesine jaýapkershilikpen qaraýy kerektigin qadap aıtty.