Mınıstr bıyl kópbalaly otbasylarǵa qansha páter beriletinin aıtty

NUR-SULTAN. QazAqparat – 2019 jyly kópbalaly otbasylarǵa 8 myńnan asa páter beriledi. Bul týraly QR Indýstrııa jáne ınfraqurylymdyq damý mınıstri Beıbit Atamqulov málim etti, dep habarlaıdy QazAqparat tilshisi.

«2017-2018 jyldary 369,8 myń sharshy metr jalǵa beriletin turǵyn úıdi (6 797 páter) iske qosý josparlanǵan, is júzinde 429,2 myń sharshy metr (7 750 páter) paıdalanýǵa berildi (57,2 mlrd teńge bólind). 2019 jyly halyqtyń áleýmettik jaǵynan osal toptaryn 6002 jalǵa beriletin pátermen qamtamasyz etý josparlanǵan. Bul baǵytta 32,8 mlrd teńge bólindi», - dedi mınıstr Parlament Májilisinde «Nurly jer» baǵdarlamasynyń júzege asyrylýyna arnalǵan Úkimet saǵatynda.

Budan basqa, Elbasynyń tapsyrmasy boıynsha 2025 jylǵa deıin 40 myń jalǵa beriletin turǵynjaı nemese jyl saıyn kópbalaly otbasylar úshin 6 myń páter salý josparlanǵan. Osy maqsat úshin 7 jyldyń ishinde 350 mlrd teńge kózdelgen, ıaǵnı jyl saıyn 50 mlrd teńgeden.

«Turǵyn úıge kezekte 38 myń otbasy tur. 3 óńirde: Túrkistan (5937), Almaty (5093) oblystarynda, Nur-Sultan qalasynda (3409) kóp balaly otbasylardyń sany kóp. Kópbalaly otbasylardyń turǵyn úı máselelerin tez arada sheshý úshin mamyr aıynan bastap barlyq qarjylandyrý kózderinen 3 046 baspana berildi. Ákimdikterdiń derekteri boıynsha ústimizdegi jyly kópbalaly otbasylaryna barlyq kózderden 8 myńnan asa páter berý josparda», - dedi Beıbit Atamqulov.