Mınıstr Birjan Nurymbetov Shymkenttegi múmkindigi shekteýli jandarmen kezdesti
Sarap barysynda Birjan Nurymbetov «Shapaǵat» múgedekterge arnalǵan ońaltý ortalyǵynyń ashylý saltanatyna qatysty. Múmkindigi shekteýli jandardyń qazirgi máselelerimen tanysyp, suraqtaryna jaýaptar berdi. Sheshimin tabýy tıis máselelerin tyńdady.
«Múgedektigi bar adamdardyń quqyqtaryn qamtamasyz etý jáne ómir súrý sapasyn jaqsartý jónindegi jumys Eńbek jáne halyqty áleýmettik qorǵaý mınıstrliginiń mańyzdy basymdyǵy bolyp tabylady. 2019 jyldyń toǵyz aıynda múgedektigi boıynsha memlekettik áleýmettik járdemaqy tóleýge 198,1 mlrd teńge baǵyttaldy. Aǵymdaǵy jyldyń 1 qazanyndaǵy jaǵdaı boıynsha, tólemaqyny alýshylar sany 521 myń 153 adamdy quraıdy. Járdemaqynyń ortasha mólsheri – 42 496 teńge. Osy jyldyń 1 shildesinen bastap múgedektigi bar balalardy jáne bala jasynan birinshi toptaǵy 18 jastan asqan adamdardy kútý boıynsha memlekettik járdemaqylardyń mólsheri artty. Onyń kólemi 41 578 teńgeni quraıdy. Búgingi kúni járdemaqynyń birinshi túrin 27 mlrd teńge somasynda - 84,7 myń adam, ekinshi túrin 4,3 mlrd teńge somasynda 13,5 myń adam aldy», – dedi mınıstr.
Birjan Nurymbetov sondaı-aq, múgedektigi bar adamdardy áleýmettik qamsyzdandyrý júıesiniń bir baǵyty jartylaı statsıonar jáne úıde kútim jasaý jaǵdaıynda arnaýly áleýmettik qyzmet kórsetý bolyp tabylatynyn atap ótti. 2019 jyly bul maqsatqa respýblıkalyq bıýdjetten 1,2 mlrd teńge kózdelgen. Búgingi kúni mundaı qyzmetter 4 myńnan astam azamatqa kórsetildi.
«Áleýmettik tólemdermen jáne arnaıy áleýmettik qyzmetterdi kórsetýmen qatar múgedekterdiń erekshe qajettilikterine de kóp kóńil bólinedi. Bizdiń mınıstrlik organızm fýnktsııasynyń ornyn toltyrý maqsatynda múgedektigi bar adamdarǵa beriletin tehnıkalyq quraldar men arnaıy qozǵalys quraldarynyń tizbesin ózektendirdi. Sońǵy úsh jyldyń ishinde ol 32-den 55 ónimge deıin keńeıtildi», - dep tolyqtyrdy ol.
Aıta keteıik, qalalyq ákimdikke qarasty kommýnaldyq memlekettik mekeme psıhonevrologııalyq aýrýlary bar 18 jastan asqan múgedekterge, birinshi jáne ekinshi toptaǵy múgedekterge arnaýly áleýmettik qyzmetter kórsetý maqsatynda ashylyp otyr. Josparly 70 orynǵa laıyqtalǵan ortalyq táýliktiń kúndizgi ýaqytynda uzaq nemese ýaqytsha (6 aıǵa deıingi merzimge) bolýǵa arnalǵan. Munda jarymjan jandarǵa arnaýly áleýmettik qyzmetter kórsetiledi.
Keıin vedomstvo basshysy «PetroQazaqstan Oıl Prodakts» JShS munaı óńdeý zaýytynyń eńbek ujymymen kezdesip, qysqa merzimdi kásiptik oqytý boıynsha bilim berý qyzmetterin kórsetetin «Álem bilim ortalyǵy» JShS-da boldy.
Buǵan deıin habarlaǵanymyzdaı, búgin Shymkentke Premer-Mınıstrdiń orynbasary Berdibek Saparbaev bastaǵan úkimettik jumys toby keldi. Úkimettik delegatsııanyń quramynda Eńbek jáne halyqty áleýmettik qorǵaý mınıstri Birjan Nurymbetov, Densaýlyq saqtaý mınıstri Eljan Birtanov, Bilim jáne ǵylym mınıstri Ashat Aımaǵambetov, Mádenıet jáne sport vıtse-mınıstri Órken Bısaqaev, Aqparat jáne qoǵamdyq damý vıtse-mınıstri Danııar Esın bar.
Sapardyń basty maqsaty – QR Prezıdenti Qasym-Jomart Toqaevtyń Qazaqstan halqyna Joldaýynyń basymdyqty baǵyttaryn túsindirý.